Галоўчанка заявіў аб планах давесці тавараабарот з Кыргызстанам да 500 млн долараў за пяць гадоў, раней гаворка ішла пра тры гады
30 студзеня, Позірк. “Зыходзячы з напрацовак, якія ўжо ёсць”, тавараабарот паміж дзвюма краінамі “цалкам рэальна давесці за найбліжэйшыя пяць гадоў да 500 млн долараў”, заявіў прэм’ер-міністр Раман Галоўчанка на сустрэчы 30 студзеня з кіраўніком урада Кыргызстана Адылбекам Касымаліевым.
Сустрэча прайшла ў Алматы (Казахстан) перад пасяджэннем Еўразійскага міжурадавага савета, паведамляе прэс-служба ўрада Беларусі.
“Гэта досыць высокая планка, — ацаніў заяўлены арыенцір Галоўчанка. — У нас ніколі такіх лічбаў не было. Але цяпер лічым іх цалкам дасягальнымі, тым больш што ёсць добрая дынаміка ў рэалізацыі двухбаковых праектаў”.
Пры гэтым, паводле слоў прэм’ера, за 11 месяцаў 2024 года аб’ём двухбаковага гандлю перавысіў 160 млн долараў.
Такім чынам, Галоўчанка на два гады павялічыў перыяд, на працягу якога тавараабарот паміж Беларуссю і Кыргызстанам павінен дасягнуць паўмільярда долараў.
28 лістапада 2024 года падчас пасяджэння міжурадавай камісіі ў Бішкеку заяўлялася, што бакі дамовіліся аб “неабходнасці актывізацыі работы дзяржаўных органаў дзвюх краін для дасягнення паказчыка тавараабароту ў 500 млн долараў у бліжэйшыя тры гады”.
Тады ж стала вядома пра амаль двухразовую розніцу ў статыстычных паказчыках двухбаковага гандлю краін. У прыватнасці, намеснік Галоўчанка Анатоль Сівак паведаміў у Бішкеку, што “за дзевяць месяцаў бягучага года тавараабарот Беларусі і Кыргызстана вырас на 14,1% і складае амаль 135 млн долараў”. Кыргызскае агенцтва kabar.kg прыводзіла статыстыку, згодна з якой аб’ём двухбаковага гандлю за той жа перыяд склаў 68 млн долараў.
Паводле распаўсюджанага відэафрагмента выступу чыноўніка, Сівак тады адзначыў, што паводле беларускай статыстыкі аб’ём двухбаковага гандлю паміж краінамі ў 2023 годзе “склаў больш за 160 млн долараў, павялічыўшыся ў параўнанні з 2022 годам амаль на 1%”.
У канцы жніўня 2023 года дзяржаўныя СМІ паведамлялі, што па выніках 2022 года тавараабарот паміж Беларуссю і Кыргызстанам перавысіў 160 млн долараў.
Паводле даных МЗС, тавараабарот Беларусі з Кыргызстанам у 2021 годзе склаў 97,1 млн долараў (беларускі экспарт — 86,2 млн).
Афіцыйны Мінск ігнаруе запыты кыргызскай Генпракуратуры аб выдачы былога прэзідэнта краіны Курманбека Бакіева, які атрымаў палітычны прытулак у Беларусі ў 2010 годзе, завочна прыгаворанага на радзіме ўжо да некалькіх доўгіх тэрмінаў пазбаўлення волі па справах, звязаных у тым ліку з карупцыяй.