Кіраўніцтва Зімбабвэ, Алжыра і Эсваціні павіншавала Лукашэнку з працягам паўнамоцтваў
31 студзеня, Позірк. Пра імкненне зімбабвійскага боку працягваць “сумеснымі намаганнямі ўмацоўваць і развіваць двухбаковыя стасункі з Беларуссю” гаворыцца ў віншаванні прэзідэнта гэтай афрыканскай краіны Эмерсана Мнангагвы на адрас Аляксандра Лукашэнкі ў сувязі з чарговым працягам паўнамоцтваў апошняга.
Як паведамляе тэлеграм-канал “Пул Першага”, Мнангагва выказаў прыхільнасць “умацаванню сяброўства паміж дзвюма краінамі” і “паглыбленню ўзаемавыгаднай супрацы на карысць народаў”.
Паведамляецца таксама пра тое, што віншаванні Лукашэнку накіраваў прэзідэнт Алжыра Абдэльмаджыд Тэбун, які, як сцвярджаецца, выказаў “поўнае задавальненне якасцю дружалюбных стасункаў і супрацы, дасягнутых паміж Алжырам і Беларуссю”, і выказаў спадзеў, што яны “атрымаюць далейшае ўмацаванне падчас будучай першай сесіі змешанай алжыра-беларускай камісіі [па гандлёва-эканамічнай супрацы] у наступным месяцы”.
Ён таксама запрасіў Лукашэнку наведаць Алжыр.
Акрамя таго, віншаванне накіравала кіраўніцтва Каралеўства Эсваціні. “Ад імя Караля Мсваці III, каралевы-маці, урада і народа” віншаванне накіраваў прэм’ер-міністр Расэл Дламіні. У ім выказваецца ўпэўненасць у тым, што праўленне Лукашэнкі прывядзе Беларусь да “росквіту, міру і развіцця”.
Беларускія ўлады актывізавалі кантакты з Зімбабвэ ў 2023 годзе, аднак актуальных даных па двухбаковым тавараабароце няма. Па выніках 2022 года аб’ём узаемнага гандлю склаў каля 40 млн долараў, 2021-га — 25 млн, 2020-га — 33,6 млн.
Лукашэнка наведваў Зімбабвэ з 30 студзеня па 1 лютага 2023 года. У красавіку таго ж года са шматдзённым візітам у Мінск прыязджала жонка прэзідэнта Зімбабвэ Аксілія Мнангагва. Летась у ліпені яна зноў была ў Беларусі з візітам, на сустрэчы з ёй Лукашэнка заявіў, што чакае візіту ў Мінск прэзідэнта.
Дыпламатычныя стасункі паміж Беларуссю і Алжырам усталяваныя ў 1995 годзе.
Паводле даных амбасады Беларусі ў Егіпце, якая адказвае ў тым ліку за прадстаўленне інтарэсаў Мінска ў Алжыры, узаемны тавараабарот у 2021 годзе склаў усяго 1,01 млн долараў. Беларусь экспартавала калійныя ўгнаенні, канцылярскія тавары, газетную паперу, пакрыты ці прасякнуты пластмасамі тэкстыль, паставак з Алжыра не было. Статыстыка па гандлі за 2022 і 2023 гады не прыводзіцца.
9 верасня, віншуючы Тэбуна з перавыбраннем прэзідэнтам краіны на другі тэрмін, Лукашэнка заявіў пра гатоўнасць у бліжэйшы час наведаць Алжыр.
Беларусь і Эсваціні ўсталявалі дыпламатычныя стасункі 4 чэрвеня 2024 года. Праз 16 дзён, 20 чэрвеня, у Мінск прыбыла эсвацінская дэлегацыя на чале з прэм’ер-міністрам Расэлам Дламіні. Бакі падпісалі дарожную карту, Мінск таксама прапанаваў навучаць эсвацінскія паліцэйскія кадры.
Прэзідэнцкія выбары ў Беларусі адбыліся 26 студзеня, іх пераможцам папярэдне абвешчаны Лукашэнка.
Такім чынам, віншаванні на яго адрас накіравалі кіраўнікі 23 дзяржаў: Азербайджана, Бахрэйна, Босніі і Герцагавіны, Венесуэлы, В’етнама, Ірана, Казахстана, Кітая, Кубы, Кыргызстана, Лаоса, Нікарагуа, ААЭ, Амана, Пакістана, Расіі, Сербіі, Таджыкістана, Туркменістана, Турцыі, Зімбабвэ, Алжыра і Узбекістана.
Вярхоўны прадстаўнік Еўрасаюза па замежных справах і палітыцы бяспекі Кая Калас і камісар па пытаннях пашырэння ЕС Марта Кос заявілі 26 студзеня ў сумеснай заяве пра тое, што выбары ў Беларусі “пазбаўленыя ўсялякай легітымнасці”.
Пра непрызнанне “фіктыўных выбараў” у Беларусі заявілі краіны Еўрасаюза, Вялікабрытанія, Канада, Аўстралія, Новая Зеландыя, Украіна.