ЦВК афіцыйна абвясціў Лукашэнку пераможцам выбараў-2025

Скрыншот: архіўны відэаматэрыял з неафіцыйнага тэлеграм-канала прэс-службы Лукашэнкі

3 лютага, Позірк. На электаральнай працэдуры, якую афіцыйны Мінск лічыць “прэзідэнцкімі выбарамі”, за Аляксандра Лукашэнку прагаласавала 86,82% выбаршчыкаў. Канчатковы вынік, які супадае з папярэднім, быў агучаны 3 лютага на пасяджэнні Цэнтральнай выбарчай камісіі.

Зыходзячы з названых лічбаў, за Сяргея Сыранкова (Камуністычная партыя Беларусі) аддадзена 3,21% галасоў, Алега Гайдукевіча (Ліберальна-дэмакратычная партыя Беларусі) — 2,02%, Ганну Канапацкую (былы член Аб’яднанай грамадзянскай партыі, дэпутат Палаты прадстаўнікоў у 2016–2019 гадах, удзельніца выбарчай кампаніі 2020 года) — 1,86%, Аляксандра Хіжняка (Рэспубліканская партыя працы і справядлівасці) — 1,74%. Супраць усіх — 3,60%.

У параўнанні з тым, што было прадстаўлена старшынёй ЦВК Ігарам Карпенкам у ноч на 27 студзеня, не змянілася аніводная з лічбаў.

Электаральная працэдура прайшла пад поўным кантролем уладаў і на фоне беспрэцэдэнтнага ўзроўню рэпрэсій.

Вярхоўная прадстаўніца Еўрасаюза па замежных справах і палітыцы бяспекі Кая Калас і камісар па пытаннях пашырэння ЕС Марта Кос адзначылі 26 студзеня ў сумеснай заяве пра тое, што выбары ў Беларусі “пазбаўленыя ўсялякай легітымнасці”.

Пра непрызнанне “фіктыўных выбараў” у Беларусі заявілі краіны Еўрасаюза, Вялікабрытанія, Канада, Аўстралія, Новая Зеландыя, Украіна.