Кізім не чакае радыкальных змен у стасунках Украіны і Беларусі ў выпадку сыходу Лукашэнкі, але без паразы РФ
7 лютага, Позірк. Цяпер Аляксандр Лукашэнка “цэментуе сваю сістэму кіравання і робіць так, каб створанае ім дзецішча існавала ў тым выглядзе, які, у яго ўяўленні, пасуе беларускаму народу”, такое меркаванне выказаў у інтэрв’ю агенцтву “Укрінформ” амбасадар па асаблівых даручэннях МЗС Украіны па Беларусі Ігар Кізім.
“Нават калі Лукашэнка страціць уладу — сыдзе ў адстаўку, зменіць свой статус і стане [толькі] старшынёй Усебеларускага народнага сходу, проста з’едзе жыць у Расію або ў эміграцыю, гэта не будзе азначаць, што тыя сілы, якія прыйдуць да ўлады пасля яго, адразу будуць дэмакратычнымі”, — канстатаваў дыпламат.
На яго думку, радыкальных змен у стасунках з Беларуссю можна чакаць толькі пры поўнай паразе Расіі ў вайне.
“Тады маецца шанец, што адчыніцца акно магчымасцяў для дэмакратызацыі Беларусі. І менавіта з такой — дэмакратычнай у шырокім сэнсе — Беларуссю я бачу перспектывы развіцця нашых двухбаковых стасункаў”, — падкрэсліў Кізім.
На думку дыпламата, Лукашэнка, размяшчаючы на беларускай тэрыторыі расійскую тактычную ядзерную зброю і ракетныя комплексы “Арэшнік”, здзяйсняе “злачынства супраць уласнага народа, таму што фактычна падстаўляе тэрыторыю Беларусі пад удар”.
“Размясціўшы ядзерную зброю, ён нічога акрамя шкоды для бяспекі сваёй краіны не дасягнуў. Да таго ж усе ясна разумеюць, што ён ніколі паўнавартасна не будзе валодаць гэтай зброяй. Так што калі Масква націсне “ядзерную кнопку”, у адказ будуць біць па Беларусі”, — перакананы спецамбасадар. У адпаведных дзеяннях Лукашэнкі ён не бачыць логікі.
Размяшчаючы сваю зброю на беларускай тэрыторыі, прэзідэнт РФ Уладзімір Пуцін, на думку Кізіма, імкнецца “глыбей зацягнуць Беларусь у вайну супраць Украіны і не даць Лукашэнку з яе выйсці”, а таксама падае “сігнал краінам НАТО”.
Разважаючы пра беларуска-кітайскую супрацу, дыпламат выказаў меркаванне, што Мінск і Пекін “наўрад ці можна назваць ваеннымі саюзнікамі”.
“Не думаю, што Пекін зацікаўлены ў тым, каб Беларусь узмацнялася мілітарна, — адзначыў ён. — Яшчэ менш у такой беларуска-кітайскай супрацы зацікаўленая Расія. На маю думку, Беларусь наўрад ці можа нешта зрабіць насуперак волі Пуціна. Так што гэта пэўны трыкутнік. Лукашэнку ён патрэбны, каб абапірацца не толькі на Расію, якая без адзінага стрэлу фактычна анексуе Беларусь”.
“Арэшнік” — расійскі комплекс і аднайменная балістычная ракета сярэдняй далёкасці, якая, як сцвярджаецца, можа несці ядзерны зарад. Дэ-факта РФ выпрабавала яго 21 лістапада, нанёсшы ўдар ракетай у бяз’ядзерным аснашчэнні па ўкраінскім горадзе Днепр, дзе знаходзіцца завод па вытворчасці ракетна-касмічнай і іншай тэхнікі “Південмаш” (“Паўдзённы машынабудаўнічы завод імя Макарава”).
Праз тыдзень, 28 лістапада, на палях саміту АДКБ у Астане (Казахстан) Лукашэнка ўпершыню заявіў пра жаданне размясціць “Арэшнік” на беларускай тэрыторыі Беларусі.
На пасяджэнні Вышэйшага дзяржсавета Саюзнай дзяржавы 6 снежня 2024 года ў Мінску Лукашэнка публічна папрасіў Пуціна разгарнуць у Беларусі “Арэшнік”. Расійскі лідар гэтага не выключыў: “Гэта стане магчымым, думаю, у другой палове наступнага года па меры нарошчвання выпуску такіх комплексаў, серыйнага выпуску гэтых комплексаў у Расіі і па меры паступлення гэтых ракетных сістэм на ўзбраенне расійскіх войск стратэгічнага прызначэння”.
На тым жа пасяджэнні яны падпісалі дамову аб гарантыях бяспекі РФ і Беларусі. Пуцін у той жа дзень заявіў, што гэты дакумент “вызначае ўзаемныя саюзніцкія абавязацельствы па забеспячэнні абароны, абарону суверэнітэту, незалежнасці і канстытуцыйнага ладу” дзвюх краін. Ён у чарговы раз нагадаў, што “гаворка ў тым ліку ідзе і пра расійскую тактычную ядзерную зброю”, як ён сцвярджае, размешчаную “на прапанову” Лукашэнкі на тэрыторыі Беларусі.
26 студзеня Лукашэнка заявіў, што “Арэшнік” будзе дастаўлены ў Беларусь “з дня на дзень”.
Расія з 24 лютага 2022 года вядзе поўнамаштабную вайну супраць Украіны, Мінск падтрымлівае Маскву. На раннім этапе агрэсіі тэрыторыя Беларусі выкарыстоўвалася для наземнага ўварвання і нанясення ракетных удараў.