ЕС плануе павысіць тарыфы для 100 відаў беларускай і расійскай сельгаспрадукцыі

7 лютага, Позірк. Еўрапейскі саюз у найбліжэйшы час плануе павысіць мытныя тарыфы на імпарт шэрагу расійскіх і беларускіх сельскагаспадарчых тавараў і ўгнаенняў. Гэта прадугледжана праектам адпаведнай пастановы Еўрапейскага парламента і Савета ЕС.

Дакумент распаўсюджваецца ў тым ліку на сельгаспрадукцыю, якая пастаўляецца праз трэція краіны.

У праекце рашэння адзначаецца, што на сельскагаспадарчыя тавары з Беларусі і Расіі тарыфы плануецца павысіць “значна і неадкладна”, а на ўгнаенні — паступова, на працягу трохгадовага пераходнага перыяду.

У абгрунтаванні пастановы гаворыцца, што “прапанаваныя тарыфныя меры забяспечаць адсутнасць камерцыйнай выгады для Расійскай Федэрацыі ад працягнення экспарту ў Еўрасаюз”. “Гэта адпавядала б інтарэсам ЕС, а таксама заканадаўству і палітыцы саюза” ў кантэксце вайны, якую вядзе супраць Украіны Расія пры падтрымцы Беларусі, адзначаецца ў паведамленні.

Пры гэтым указваецца, што “Беларусь экспартуе абмежаваную колькасць адпаведных сельскагаспадарчых тавараў і ўгнаенняў (92 млн еўра сельскагаспадарчых тавараў і 29,6 млн еўра ўгнаенняў у 2023 годзе)” і “не з’яўляецца важным вытворцам ці экспарцёрам гэтых тавараў”.

“Тым не менш сфера дзеяння прапанаванага рэгулявання ўключае Беларусь у сувязі з яе цеснымі палітычнымі і эканамічнымі сувязямі з Расійскай Федэрацыяй і ў мэтах прадухілення незаконнага і махлярскага накіравання імпарту з Расійскай Федэрацыі праз Рэспубліку Беларусь, што можа адбыцца, калі тарыфы ЕС на імпарт адпаведных тавараў, якія паходзяць з Беларусі ці імпартуюцца з яе, застануцца нязменнымі”, — заяўляецца ў апісанні дакумента.

“Улічваючы працяг збліжэння і рост гандлю паміж Беларуссю і Расіяй”, у ЕС лічаць “мэтазгодным” атаясамліваць тавары дзвюх краін пры выкарыстанні ў дачыненні да іх павышаных тарыфаў.

На думку аўтараў дакумента, “прапанаваная пастанова прадугледжвае павышэнне тарыфаў на адпаведныя тавары <…> да ўзроўню, дастаткова высокага, каб спыніць іх імпарт”.

У прыватнасці, як заяўляецца, у дачыненні да “ўсіх адпаведных сельскагаспадарчых тавараў” будзе прымяняцца павышальная “адвалорная пошліна ў памеры 50%”.

“Для адпаведных угнаенняў, акрамя існуючай адвалорнай пошліны ў памеры 6,5%, тарыф будзе абкладацца дадатковай спецыфічнай пошлінай, якая будзе паступова павялічвацца, пачынаючы з 40 або 45 еўра за тону, у залежнасці ад тыпу ўгнаенняў (прыблізна 13% у адвалорным эквіваленце), да забароннага ўзроўню ў 315 або 430 еўра за тону адпаведна на працягу трох гадоў”, — адзначаюць аўтары дакумента.

“На працягу трохгадовага пераходнага перыяду гэтыя забаронныя тарыфы будуць таксама ўведзены ў выпадку, калі тавары з Расійскай Федэрацыі і Рэспублікі Беларусь будуць імпартавацца ў аб’ёме, які перавышае вызначаныя ўстаноўленыя ліміты”, — заяўлена ў праекце пастановы.

Паведамляецца, што павышэнне тарыфаў закране каля 100 найменняў прадукцыі (згодна з кодамі камбінаванай наменклатуры ЕС).

Пра тое, што Еўрапейская камісія зацвердзіла прапанову аб увядзенні тарыфаў на шэраг сельскагаспадарчых тавараў з Беларусі і Расіі, а таксама на “некаторыя азотазмяшчальныя ўгнаенні”, паведамлялася ў яе афіцыйным рэлізе 29 студзеня.

Такім чынам, апублікаваны праект дакумента канкрэтызуе згаданыя планы.

1 ліпеня 2024 года ЕС павысіў тарыфы на імпарт некаторых відаў сельскагаспадарчай прадукцыі з Беларусі і Расіі. Яны, у прыватнасці, закранаюць зерневыя, алейныя культуры і прадукты іх перапрацоўкі, а таксама гранулы бураковага жому і сушаны гарох.