У 2024 годзе вытворцы больш за тысячу разоў прасілі пра павышэнне коштаў — выдадзена 572 дазволы

10 лютага, Позірк. Больш за тысячу зваротаў ад вытворцаў у органы ўлады паступіла ў 2024 годзе з просьбай дазволіць павышэнне коштаў, вынікае з заявы міністра антыманапольнага рэгулявання Артура Карповіча дзяржСМІ.

Паводле яго слоў, у органаў улады ёсьць паўнамоцтвы прымаць падобныя рашэнні. “Таму што мы разумеем: ёсць аб’ектыўныя прычыны, калі трэба павысіць адпускную цану, каб не загнаць у страты асобнае прадпрыемства або цэлую галіну“, — сказаў Карповіч.

Пры гэтым, падкрэсліў чыноўнік, заўсёды акцэнтавалася, што падтрымка будзе нададзеная “ў насамрэч важным выпадку“. “Калі будзем бачыць, што той, хто звярнуўся, са свайго боку папярэдне прарабіў вялікую працу па мінімізацыі сваіх выдаткаў, пастараўся як мог паменшыць велічыню, на якую трэба будзе павысіць цану“, — патлумачыў чыноўнік.

Карповіч сцвярджае, што ў 2024 годзе, згодна “звестак, якія паступілі ў МАРГ ад органаў дзяржкіравання, выканкамаў і дзяржарганізацый, прынята 572 рашэнні аб павышэнні цэн“. “Зваротаў ад вытворцаў за павышэннем коштаў было, вядома, у разы больш“, — сказаў ён, не ўдакладніўшы, у колькі.

Беларусь з паказчыкам 5,16% заняла сёмае месца па росце спажывецкіх цэн у 2024 годзе на тэрыторыі былога СССР, сведчыць праведзены “Позіркам” аналіз звестак нацыянальных органаў статыстыкі.

Па выніках студзеня яна была шостай (0,79%), студзеня — лютага і першага квартала — другой (1,74% і 2,22%), студзеня — красавіка — пятай (2,66%), студзеня — траўня — сёмай (2,77%), першага паўгоддзя — шостай (3,39%), студзеня — ліпеня і студзеня — жніўня — сёмай (3,42% і 3,35%), студзеня — верасня і студзеня — кастрычніка — шостай (3,80% і 4,27%), студзеня — лістапада — сёмай (4,57%).

Паводле найважнейшых прагнозных (дэ-факта планавых) параметраў развіцця краіны на мінулы год, інфляцыя не павінна была перавысіць 5%.

Назапашаны да пачатку 2025 года інфляцыйны навес “узмацняе рызыкі для цэнавай стабільнасці і фінансавага становішча прадпрыемстваў“, гаворыцца ў аглядзе даследчага цэнтра BEROC.

6 кастрычніка 2022 года Лукашэнка па выніках нарады аб цэнавай сітуацыі ў краіне падпісаў дырэктыву № 10 “Аб недапушчальнасці росту коштаў”.

Пастановай урада ад 19 кастрычніка 2022 года № 713 было ўведзенае рэгуляванне цэн на тавары ўсяго спажывецкага кошыка. Пазней з яго былі выключаныя некаторыя групы тавараў, падкарэктаваныя правілы рэгулявання коштаў.

18 кастрычніка 2024 года на той момант міністр антыманапольнага рэгулявання і гандлю Аляксей Багданаў паведаміў, што ўрад распрацоўвае “альтэрнатыўную сістэму рэгулявання коштаў” з “найменшым умяшаннем дзяржавы ў працэсы цэнаўтварэння”.

14 студзеня пры прызначэнні Карповіча кіраўніком МАРГ Лукашэнка заявіў, што прыватныя гандлёвыя прадпрыемствы ўлады будуць “кантраляваць і накіроўваць іх працу, сама так, як прамысловыя“.

“Ваша задача — вывучыць досвед савецкага гандлю і зрабіць усё, каб на прылаўках быў асартыментны пералік тавараў, — звярнуўся ён да новага кіраўніка МАРГ. — Як спецыяліст вы разумееце, пра што я кажу. І кошты ні ў якім разе каб не скакалі, асабліва ўверх. Гэта вы павінны бачыць на аб’ектах гандлю — у крамах. Няважна, якой уласнасці яны, дзяржаўныя або прыватныя”.