Еўрапарламент працягне змагацца за вызваленне беларускіх палітвязняў — Ціханоўская
10 лютага, Позірк. Праблему вызвалення палітвязняў абмеркавалі 10 лютага ў Брусэлі Святлана Ціханоўская і прэзідэнт Еўрапейскага парламента (ЕП) Раберта Метсола, паведаміла ў відэазвароце па выніках сустрэчы беларускі палітык.
Паводле яе слоў, бакі “шмат казалі пра мужную Паліну Шарэнду-Панасюк, яе вызваленне з турмы“. “Год таму Раберта стала сімвалічнай хроснай Паліны і няспынна змагалася за яе вызваленне. Я перадала прывітанне і падзяку ад Паліны і спадзяюся, што Паліна неўзабаве зможа сама сустрэцца і распавесці еўрапейскім палітыкам пра ўсе жахі, праз якія ёй давялося прайсці”, — сказала Ціханоўская.
Метсола, працягнула дэмлідар, абяцала, што ЕП працягне змагацца за вызваленне кожнага палітвязня, але ў першую чаргу неабходна дамагацца спынення рэпрэсій.
На фоне трохмесячнай замаразкі і рэвізіі дапамогі замежным арганізацыям новай амерыканскай адміністрацыяй Ціханоўская і Метсола “абмеркавалі падтрымку беларускіх медыя і грамадзянскай супольнасці“. “Вельмі важна, каб журналісты, блогеры працягвалі сваю працу”, — заявіла дэмлідар.
Бакі “шмат часу” абмяркоўвалі магчымыя перамовы па Украіне і лёс Беларусі. “Я працягваю настойваць, каб інтарэсы беларусаў таксама былі ўлічаныя, а Беларусь не стала “суцяшальным прызам“ для Пуціна“, — падкрэсліла Ціханоўская.
“Наша задача — трымаць Беларусь высока ў міжнародным парадку дня. Прэзідэнт Метсола прасіла перадаць усім беларусам словы падтрымкі, асабліва тым, хто знаходзіцца ўнутры краіны і працягвае барацьбу“, — адзначыла палітык.
4 лютага намеснік старшыні камітэта ЕП па замежных справах Дэвід Макалістэр, пастаянны дакладчык па Беларусі Хельмут Брандштэтэр і старшыня дэлегацыі ЕП па сувязях з Беларуссю Малгажата Гасеўска ў сумеснай заяве па Беларусі назвалі вызваленне Паліны Шарэнда-Панасюк “найважнейшым крокам на шляху да ліквідацыі парушэнняў правоў чалавека“ і падкрэслілі сур’ёзную занепакоенасць “з нагоды тысяч беларусаў, зняволеных у турмы з палітычных матываў, якія ўтрымліваюцца ў жудасных умовах, падвяргаюцца катаванням, пазбаўленыя медыцынскай дапамогі, абмежаваныя ў зносінах з членамі сям’і і адвакатамі“.
Заяўнікі паўтарылі заклік да ЕС і яго членаў падтрымаць палітвязняў і іх сем’і, пры любой магчымасці патрабаваць іх неадкладнага і безумоўнага вызвалення, спрасціць візавыя працэдуры для беларусаў, якія бягуць ад рэжыму.
“Мы заклікаем ЕС і яго партнёраў працягваць здзяйсняць ціск на рэжым праз пашырэнне і ўзмацненне санкцый супраць фізічных і юрыдычных асоб, адказных за рэпрэсіі ў Беларусі; нацэльвання іх на тых, хто нясе адказнасць за ўдзел Беларусі ў агрэсіўнай вайне Расіі супраць Украіны і прыняцце канкрэтных рашэнняў пытання аб прымусовай працы палітычных зняволеных“, — сказана ў заяве.
Пра вызваленне Паліны Шарэнды-Панасюк 1 лютага паведаміў яе муж Андрэй Шарэнда.
6 лютага пасля эвакуацыі з Беларусі жанчына прыехала ў Вільнюс.
22 студзеня Еўрапарламент прыняў рэзалюцыю аб непрызнанні беларускіх выбараў і легітымнасці Лукашэнкі. 25 студзеня, за дзень да асноўнага дня галасавання, Раберта Метсола назвала кампанію фікцыяй і звярнулася да народа краіны: “Трымайцеся, мы вас падтрымліваем, час дыктатуры скончыцца. Дэмакратыя пераможа”.
10 лютага Ціханоўская сустрэлася ў Брусэлі таксама са старшынёй Еўрапейскага савета Антоніу Коштай.