Актыўнасць нелегалаў на мяжы Беларусі і ЕС у чатыры разы перавышае паказчыкі пачатку мінулага года
11 лютага, Позірк. У 4,3 раза вырасла актыўнасць нелегальных мігрантаў на мяжы Беларусі і Еўрасаюза ў студзені і першай дэкадзе лютага 2025 года ў параўнанні з аналагічным леташнім перыядам, сведчыць праведзены “Позіркам“ параўнальны аналіз аператыўных звестак памежных службаў суседніх краін ЕС.
З пачатку гэтага года папярэджана не менш 648 спробаў незаконнага перасячэння мяжы з боку Беларусі супраць 150 за аналагічны леташні перыяд.
Польшча папярэдзіла не менш 392 спробаў супраць 135 (рост у 2,9 раза), Латвія — 174 супраць 5 (у 34,8 раза), Літва — 82 супраць 10 (у 8,2 раза).