Лукашэнка ўхваліў папраўкі ў закон аб дарожным руху, якія дазваляюць 17-гадовым кіраваць трактарам
13 лютага, Позірк. Аляксандр Лукашэнка 13 лютага падпісаў абноўлены закон “Аб дарожным руху”.
Прынятыя папраўкі ў гэты закон прадугледжваюць сярод іншага павелічэнне максімальна дапушчальнай магутнасці рухавіка для колавых трактароў і самаходных машын катэгорый C, D, E, F (з 80 да 110,3 кілавата), якія выкарыстоўваюцца для выканання сельскагаспадарчых работ, адзначае прэс-служба Лукашэнкі.
У адпаведнасці са зменамі, “асобы, якія дасягнулі сямнаццацігадовага ўзросту, змогуць атрымліваць права кіравання самаходнымі машынамі сельгаспрызначэння, а таксама колавымі трактарамі з рухавікамі магутнасцю да 110,3 кілавата (напрыклад, такімі як “Беларус-1221″)”, гаворыцца ў паведамленні.
“Гэта дазволіць больш актыўна прыцягваць навучэнцаў устаноў прафесійна-тэхнічнай адукацыі да пасяўных і ўборачных работ”, — заяўляе прэс-служба Лукашэнкі.
29 студзеня перад прыняццем законапраекта ў другім чытанні ў Палаце прадстаўнікоў Нацыянальнага сходу намеснік міністра сельскай гаспадаркі і харчавання Уладзімір Гракун заявіў, што змены накіраваныя на “паляпшэнне забеспячэння сельгасгаліны кадрамі механізатараў”.
“Падыходы сфармуляваны Мінсельгасхарчам з улікам прапаноў, якія паступілі ад Міністэрства аховы здароўя, Міністэрства ўнутраных спраў і іншых зацікаўленых дзяржаўных органаў”, — адзначыў чыноўнік, удакладніўшы, што гэта “дазволіць у сезон масавых палявых работ задаволіць патрэбы ў дадатковай колькасці механізатарскіх кадраў за кошт прыцягнення практыкантаў ВНУ і каледжаў для выканання такіх сельгасаперацый, як узворванне, баранаванне, пасяўныя работы, культывацыя, апрацоўка, пасадка, нарыхтоўка зялёнай масы, уборка і вываз ураджаю”.
Законапраект быў ухвалены Саветам Рэспублікі 30 студзеня.
З праблемай недахопу кадраў беларуская сельская гаспадарка сутыкаецца на працягу апошніх гадоў. Пытанне вырашаецца прыцягненнем спецыялістаў з іншых галін эканомікі.
7 красавіка 2024 года ў эфіры тэлеканала “Беларусь 1” міністр сельскай гаспадаркі і харчавання Сяргей Барташ заявіў, што “да [вяснова-палявых] работ прыцягнута больш за 2 тыс. спецыялістаў-механізатараў з гарадскіх прадпрыемстваў, а таксама каля 1 тыс. студэнтаў, з іх каля 200 маюць вадзіцельскае пасведчанне механізатара”.
27 чэрвеня Барташ быў вызвалены ад пасады кіраўніка Мінсельгасхарча, новым міністрам стаў Анатоль Ліневіч.