За год сума наяўных грошай у абароце вырасла на 26% — Нацбанк

14 лютага, Позірк. Сума наяўных грошай у абароце (агрэгат М0) на 1 лютага 2025 года склала 11 млрд 836 млн рублёў, зменшыўшыся за месяц на 20,3 млн (на 1 студзеня — 11 млрд 856,3 млн; -0,2%), паведамляе Нацыянальны банк.

Разам з тым у гадавым выражэнні гэты паказчык павялічыўся на 26% (на 1 лютага 2024-га — 9 млрд 396,9 млн рублёў).

Пераводныя дэпазіты за год сталі большыя на 20,9% — з 12 млрд 441,2 млн да 15 млрд 37,8 млн рублёў.

Наяўныя грошы ў абароце і пераводныя дэпазіты ў нацыянальнай валюце (М1) павялічыліся на 23,1% — з 21 млрд 838,1 млн да 26 млрд 873,8 млн.

Грашовая маса ў нацыянальным вызначэнні (М2) павялічылася з 38 млрд 284,9 млн да 49 млрд 766,7 млн (+30%), рублёвая грашовая маса (М2*) — з 40 млрд 176,1 млн да 51 млрд 834,6 млн (+29%), шырокая грашовая маса (М3) — з 73 млрд 138 млн да 86 млрд 473,9 млн (+18,2%).

Захаванне ў Беларусі наяўных грошай і бягучых рахункаў у якасці асноўнага драйвера росту грашовай масы “нясе інфляцыйна-дэвальвацыйныя рызыкі пры ўзнікненні знешніх шокаў”, гаварылася ў сакавіцкім 2024 макраэканамічным аглядзе Еўразійскага банка развіцця.

У студзені 2024 года эканамісты праекта “Кошт урада” адзначалі, што павелічэнне ролі наяўных грошай у эканоміцы нясе шэраг пагроз і рызык — ад “росту аб’ёму ценявых плацяжоў і шэрых схем бізнесу” да “падвышэння рызыкі раскручвання інфляцыі і дэвальвацыі”.

7 жніўня таго ж года прэм’ер-міністр Раман Галоўчанка заявіў, што “так званыя эксперты палохаюць перагрэвам эканомікі”. “З таго боку ўсе эканамічныя навіны падаюцца выключна ў негатыўным ключы, разлічваючы на людзей, якія не вельмі разбіраюцца ў эканамічных мадэлях”, — сказаў кіраўнік урада.

Паводле яго сцвярджэння, у эканоміцы “магло б быць яшчэ больш грошай”, але пакуль урад “не бачыць патрэбы ў дадатковай крэдытнай падтрымцы банкаўскай сістэмы”.

Перагрэў эканомікі “ўсё ж маецца”, і яго маштаб “досыць значны”, заявіў у гэты ж дзень на брыфінгу старэйшы навуковы супрацоўнік даследчага цэнтра BEROC Анатоль Харытончык.

11 лістапада эксперт адзначыў, што беларуская эканоміка ў трэцім квартале “заставалася сур’ёзна перагрэтай — дадатны разрыў выпуску склаў 3,2%”. У той час як дэфіцыт на рынку працы “прагрэсаваў — 0,9 беспрацоўнага на вакансію”.

За 2024 агрэгат М0 вырас на 25,1% (за 2023-ы — на 37,44%), М1 — на 19,9% (на 33,85%), М2 — на 34,28% (на 29,8%), М2* — на 28,6% (на 34,73%), М3 — на 17,3% (на 23,56%).