Па выніках 2024 года Беларусь засталася на другім месцы ў ЕАЭС па росце прамысловай вытворчасці

16 лютага, Позірк. Па выніках студзеня — снежня 2024 года Беларусь заняла другое месца ў Еўразійскім эканамічным саюзе (ЕАЭС) па росце прамысловай вытворчасці ў параўнанні з аналагічным перыядам 2023-га, сведчыць праведзены “Позіркам” аналіз даных дэпартамента статыстыкі Еўразійскай эканамічнай камісіі (ЕЭК).

Па выніках студзеня і студзеня — лютага 2024 года да адпаведных перыядаў 2023-га Беларусь была на трэцім месцы, далей — на другім.

За 12 месяцаў 2024 года ў цэлым па ЕАЭС аб’ём прамысловай вытворчасці павялічыўся ў гадавым вымярэнні на 4,5% (за 11 — на 4,3%, 10 — на 4,4%): у Кыргызстане — на 5,5% (+4,8% і +5,2% адпаведна), Беларусі — на 5,4% (+5,5% і +6,2%), Арменіі — на 4,7% (+7,6% і +11,7%), Расіі — на 4,6% (+4,3% і +4,4%), Казахстане — на 2,7% (+2,7% і +2,6%).

У горназдабыўной прамысловасці і распрацоўцы кар’ераў у ЕАЭС зафіксавана падзенне на 0,7% (-0,7% і -0,4%). Паказчык знізіўся ў Казахстане — на 0,1% (+0,1% і +0,3%), Расіі — на 0,9% (-0,8% і -0,7%) і Арменіі — на 8,6% (-8% і -8,1%). У Кыргызстане ён вырас на 4% (+1,8% і -0,6%), Беларусі — на 3,6% (+4% і +4%).

Вытворчасць у апрацоўчай прамысловасці павялічылася ў цэлым па саюзе на 8,2% (+7,8% і +7,9%): у Расіі — на 8,5% (+8% і +8,1%), Арменіі — на 6,5% (+10,8% і +17,4%), Казахстане — на 5,9% (+5,3% і +4,8%), Кыргызстане — на 5,8% (+5% і +5%), Беларусі — на 5,5% (+5,5% і +6,3%).

Усе дзяржавы паказалі рост у галіне электразабеспячэння, падачы газу, пара і паветранага кандыцыянавання — у сярэднім на 2,7% (+3,2% і +3,4%): Кыргызстан — на 15,8% (+14,1% і +15,1%), Арменія — на 12,6% (+12,6% і +12,4%), Беларусь — на 5,5% (+6,5% і +6,4%), Казахстан — на 4,5% (+4,5% і +4,9%), Расія — на 2,3% (+2,8% і +3%).

У сферы водазабеспячэння, каналізацыі, кантролю над зборам і размеркаваннем адходаў у ЕАЭС зафіксавана зніжэнне на 0,1% (+0,2% і +0,4%). Лідарам у гэтым сектары стаў Кыргызстан, які павялічыў вытворчасць на 17,7% (+17,8% і +17,6%). Далей ідуць Арменія — рост на 5,8% (+5,7% і +5,5%), Беларусь — на 0,2% (+0,2% і +1,5%). Казахстан прадэманстраваў падзенне на 0,3% (-0,3% і +1,2%), Расія — на 0,1% (-0,2% і +0,4%).

У снежні 2024 года цэны вытворцаў прамысловай прадукцыі ў ЕАЭС у гадавым вымярэнні выраслі на 7,8%: у Кыргызстане — на 17,2%, Расіі — на 7,9%, Казахстане — на 7,3%, Беларусі — на 6,2%, Арменіі — на 5,7%.

Раней паведамлялася, што запасы гатовай прамысловай прадукцыі на складах па выніках 2024 года склалі 8 млрд 689 млн 777 тыс. рублёў. Праведзены “Позіркам” аналіз даных Белстата паказаў, што з 2020 года яны павялічыліся на 71,2% (з 5 млрд 74 млн 469 тыс.).

Горшая дынаміка зафіксавана ў Брэсцкай і Гомельскай абласцях, дзе затаваранасць стала большай на 88,6% (з 654 млн 468 тыс.да 1 млрд 234 млн 214 тыс. рублёў ) і 83,1% (з 439 млн 716 тыс. да 805 млн 55 тыс.) адпаведна.

На прамысловых прадпрыемствах Мінска запасы выраслі на 73,5% (з 1 млрд 52 млн 47 тыс. да 1 млрд 825 млн 133 тыс. рублёў), Віцебскай вобласці — на 71,4% (з 520 млн 103 тыс. да 891 млн 199 тыс.), Гродзенскай — на 66,7% (з 630 млн 165 тыс. да 1 млрд 50 млн 563 тыс.), Магілёўскай — на 63% (з 392 млн 354 тыс. да 639 млн 390 тыс.), Мінскай — на 62% (з 1 млрд 385 млн 616 тыс. да 2 млрд 244 млн 223 тыс.).