Палітзняволеная Вольга Маёрава можа страціць зрок — Зазулінская

17 лютага, Позірк. Да “міжнародных партнёраў, праваабаронцаў, СМІ і неабыякавых беларусаў і беларусак” звярнулася з заклікам адрэагаваць прадстаўніца па сацыяльнай палітыцы Аб’яднанага пераходнага кабінета (АПК) Вольга Зазулінская.

Яе заява тычыцца сітуацыі з жанчынамі, якія знаходзяцца ў зняволенні ў Беларусі.

“У беларускіх турмах працягваецца мэтанакіраванае знішчэнне людзей. Праз пазбаўленне медыцынскай дапамогі, катаванні і ізаляцыю іх даводзяць да стану, калі жыццё вісіць на валаску. Асабліва цяжкая сітуацыя ў [палітзняволеных] Вікторыі Кульшы, Алены Гнаўк і Вольгі Маёравай, і мы не маем права адварочвацца ад іх пакут”, — адзначыла Зазулінская.

Кульша, паводле яе слоў, здзейсніла дзве спробы суіцыду, тройчы трымала галадоўку, мае сур’ёзныя праблемы з ныркамі. На мінулым тыдні, як сцвярджае прадстаўніца АПК, “да яе выклікалі рэанімацыю, бо яна ўжо не можа ўстаць на ногі”, у выпадку канчатковай адмовы нырак “без дыялізу яна не выжыве”.

“Гэта не пакаранне, гэта катаванне і асуджэнне на смерць”, — падкрэсліла Зазулінская.

Гнаўк адмовілася пісаць прашэнне аб памілаванні, за што “яе сістэматычна знішчаюць”, у яе “цяжкія крывацёкі, звязаныя з праблемамі са страўнікам”, паведамляе прадстаўніца АПК. “Яна працягвае змагацца, але сілы сыходзяць, а дапамога ёй не аказваецца”, — дадала Зазулінская.

Маёрава, паводле яе слоў, “рызыкуе цалкам страціць зрок”, медыкі папраўчай калоніі адмовілі ёй у лячэнні з-за статусу “тэрарысткі”, палітзняволенай не перадаюць лекі і медыцынскія бандэролі ад родных.

Інфармацыя пра гэтых жанчын стала вядомая дзякуючы палітзняволеным, якія выйшлі на волю. Гэта, як падкрэсліла Зазулінская, “не проста парушэнне правоў чалавека”.

“Катаванні. Павольныя забойствы. Беларускія палітвязні ў крытычным стане. Гэта нельга ігнараваць. Мы патрабуем ад рэжыму ў Беларусі тэрміновых дзеянняў па аказанні медыцынскай дапамогі ўсім палітвязням. І мы патрабуем жорсткага міжнароднага рэагавання на тое, што адбываецца з жанчынамі ў турмах Беларусі”, — заявіла прадстаўніца АПК.

Беларускія дэмсілы, дадала яна, ужо доўгі час “настойліва звяртаюцца да міжнароднай супольнасці, каб дамагчыся вызвалення ўсіх беларускіх палітвязняў”.

Пра дрэнны стан здароўя Кульшы, Гнаўк і Маёравай паведамляла на прэс-канферэнцыі 10 лютага ў Вільнюсе экс-палітзняволеная Паліна Шарэнда-Панасюк.

“Я б хацела перадаць вялікае прывітанне [людзям], якія засталіся ў так званай калоніі № 24 (знаходзіцца ў гарадскім пасёлку Зарэчча Рэчыцкага раёна Гомельскай вобласці. — “Позірк”.), — сказала яна. — Гэта [палітзняволеныя] Вольга Маёрава, Алена Гнаўк, Вікторыя Кульша. Становішча гэтых жанчын проста жудаснае”.