Удзел беларускага войска ў вайне супраць Украіны малаверагодны, бо гэта можа пагражаць рэжыму Лукашэнкі — контрвыведка Латвіі
18 лютага, Позірк. Удзел Беларусі ў вайне супраць Украіны “ў агляднай будучыні малаверагодны”, бо “можа істотна пагражаць унутрыпалітычнай стабільнасці краіны і становішчу Аляксандра Лукашэнкі”. Пра гэта гаворыцца ў дакладзе Бюро абароны Канстытуцыі Латвіі, паведамляе партал навінаў Delfi.
Верагоднасць такога развіцця падзей невялікая, паколькі ў краіне маецца “моцнае грамадскае непрыманне” ўступлення ў баявыя дзеянні беларускіх вайскоўцаў, адзначаецца ў публікацыі.
На думку бюро, супрацоўніцтва з Расіяй “служыць гарантыяй паўнамоцтваў” Лукашэнкі, дазваляе яму ўтрымліваць уладу і забяспечваць стабільнасць свайго рэжыму. Аднак, падкрэслівае латвійская контрвыведка, Лукашэнка ўсведамляе, што цесная сувязь з Крамлём “ставіць пад пагрозу яго здольнасць і далей кіраваць краінай”“, таму ён “усё больш заклапочаны неабходнасцю паменшыць ізаляцыю Беларусі ад Захаду“, каб “ураўнаважыць расійскі ўплыў“.
У дакладзе выказваецца здагадка, што многія інструменты расійскага ўплыву ў Беларусі захаваюцца і пасля сыходу ад улады Лукашэнкі і прэзідэнта РФ Уладзіміра Пуціна.
У дакуменце канстатуецца, што ў 2024 годзе ў Беларусі працягвалі ўзмацняцца палітычныя рэпрэсіі ў дачыненні да апанентаў улады і іх сваякоў, адначасова з гэтым “апазіцыя працягвала праяўляць актыўнасць”. “Нізкі ўзровень цікавасці да дзейнасці дэмакратычных сіл” з боку грамадства тлумачыцца “шэрагам прычын”, у прыватнасці, рызыкай палітычнага пераследу і пазбаўлення волі.
Паводле ацэнкі спецслужбы, рэжым Лукашэнкі застаецца стабільным “у асноўным за кошт рэпрэсій і абмежавання свабоды слова”.
Прэзідэнт Украіны Уладзімір Зяленскі заявіў 12 лютага, што Расія падрыхтуе 15 дывізій “для трэніровак і ўзмацнення сітуацыі на беларускім кірунку”, адзначыўшы, што гэта будзе каля 100–150 тыс. чалавек. Пры гэтым кіраўнік дзяржавы адзначыў, што не можа дакладна сказаць, ці ўсе гэтыя згаданыя вайскоўцы будуць знаходзіцца на тэрыторыі Беларусі.
Зяленскі лічыць, што гэтыя войскі могуць уварвацца як ва Украіну, па аналогіі з 2022 годам, так і ў Польшчу і краіны Балтыі.
3 лютага прэс-служба Мінабароны Беларусі паведаміла аб пачатку праверкі баявой гатоўнасці ва Узброеных сілах. Ведамства папярэдзіла, што на час праверкі “запланавана перамяшчэнне ваеннай тэхнікі”, таму “магчыма часовае абмежаванне руху грамадзянскага транспарту па дарогах агульнага карыстання і ўчастках мясцовасці”.
Рэжым Лукашэнкі безупынна праводзіць вучэнні, трэніроўкі, зборы на фоне абвастрэння адносін з Захадам і поўнамаштабнай вайны Расіі супраць Украіны, у якой афіцыйны Мінск падтрымлівае Крэмль.
У лютым 2022 года ўварванне ажыццёўлена ў тым ліку з беларускай тэрыторыі.