У Польшчы за перавозку нелегальных мігрантаў будуць судзіць 34-гадовага беларуса

18 лютага, Позірк. Пракуратура Владаўскага павята (Люблінскае ваяводства) перадала ў суд матэрыялы крымінальнай справы ў дачыненні да двух замежнікаў, якія абвінавачваюцца ў перавозцы нелегальных мігрантаў.

Паведамляецца, што гаворка ідзе пра 34-гадовага грамадзяніна Беларусі Івана Б. і 51-гадовага грамадзяніна Украіны Аляксея В.

Паводле матэрыялаў справы, з траўня па верасень 2024 года мужчыны, дзейнічаючы па загадзя складзеным плане ў мэтах атрымання матэрыяльнай выгады “сумесна з устаноўленымі і неўстаноўленымі асобамі”, здзейснілі некалькі дзясяткаў паездак ад беларуска-польскай мяжы ў напрамку мяжы з Германіяй.

Сцвярджаецца, што яны перавозілі нелегальных мігрантаў — усяго некалькі дзясяткаў чалавек, якія праніклі ў Польшчу з беларускай тэрыторыі.

“Супрацоўнікі памежнай службы, якія ажыццяўлялі назіранне ў раёне польскай мяжы, заўважылі два транспартныя сродкі. Адным кіраваў Аляксей В., іншым — Іван Б. Тым часам з лесу выбеглі двое мужчын, грамадзян Сірыі, яны ўзначальвалі вялікую групу [мігрантаў]. Яны паказалі, што для таго, каб дабрацца да Германіі, ім давялося праехаць праз Расіею і Беларусь”, — апісваецца адзін з выпадкаў у рэлізе.

Адзначаецца, што група з 12 сірыйцаў “была сфарміраваная недалёка ад польска-беларускай мяжы і пераправілася праз раку Буг на пантоне”.

Беларус і ўкраінец атрымлівалі інструкцыі ад невядомай асобы, якая ўказвала ім маршруты перавозкі нелегалаў. “У названых месцах мігрантаў павінны былі чакаць два чорныя аўтамабілі. Іх далейшаму падарожжу перашкодзілі супрацоўнікі памежнай службы”, — гаворыцца ў паведамленні люблінскай пракуратуры.

Адзначаецца, што арганізатары схемы наймалі кіроўцаў з дапамогай інтэрнэт-аб’яваў, прапаноўваючы за такія паслугі ўзнагароджанне.

Абвінавачаным па справе пагражае да 8 гадоў зняволення, падкрэсліваецца ў паведамленні, яны ўтрымліваюцца пад вартай.

Міграцыйны крызіс на мяжы Беларусі і краін ЕС працягваецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.

У 2024 годзе суседнія краіны Еўрапейскага саюза зафіксавалі 36.291 спробу мігрантаў нелегальна перасекчы мяжу з боку Беларусі — на 13,8% менш, чым у 2023-м (42.078), сведчыць праведзены “Позіркам” аналіз звестак памежных службаў.

На польскім участку мяжы Еўрасаюзу за год зарэгістравана 29.972 такія спробы (+17,2%; 25.571), латвійскім — 5.317 (-61,7%; 13.863), літоўскім — 1.002 (-62,1%; 2.644).

11 лютага “Позірк“ паведамляў, што ў студзені і першай дэкадзе лютага актыўнасць нелегальных мігрантаў на мяжы Беларусі і Еўрасаюза вырасла ў 4,3 раза ў параўнанні з аналагічным леташнім перыядам. На той дзень з пачатку года было папярэджана не менш за 648 спробаў незаконнага перасячэння мяжы з боку Беларусі супраць 150 за аналагічны леташні перыяд. Польшча папярэдзіла не менш за 392 спробы супраць 135 (рост у 2,9 раза), Латвія — 174 супраць 5 (у 34,8 раза), Літва — 82 супраць 10 (у 8,2 раза).