Беларусь стала назіральнікам у азіяцкай Парламенцкай асамблеі

19 лютага, Позірк. Нацыянальны сход Беларусі атрымаў статус назіральніка ў Азіяцкай парламенцкай асамблеі (АПА).

Паводле інфармацыі азербайджанскага агенцтва АРА, такое рашэнне было ўхваленае падчас 15-й пленарнай сесіі АПА, якая праходзіць у Баку 17-21 лютага. Адначасова членам арганізацыі стаў Аман.

Такім чынам, у АПА ўваходзяць парламенты 44 дзяржаў: ААЭ, Азербайджана, Амана, Афганістана, Бангладэш, Бахрэйна, Бутана, В’етнама, Емена, Індыі, Інданезіі, Іарданіі, Ірака, Ірана, Казахстана, Камбоджы, Катара, Кіпра, Кірыбаці, Кітая, КНДР, Кувейта, Кыргызстана, Лаоса, Лівана, Малайзіі, Мальдыўскіх выспаў, Манголіі, Непала, Пакістана, Палау, Палестыны, Паўднёвай Карэі, Расіі, Саудаўскай Аравіі, Сірыі, Таджыкістана, Тайланда, Тонга, Турцыі, Узбекістана, Усходняга Тымора, Філіпін і Шры-Ланкі.

Статус назіральніка маюць заканадаўчыя органы Аўстраліі, Беларусі, Вануату, Маршалавых выспаў, Мікранезіі, Науру, Новай Зеландыі, Папуа — Новай Гвінеі, Саламонавых астравоў, Самоа, Тувалу, Туркменістана, Фіджы і Японіі. Беларускі парламент стаў адзіным заканадаўчым органам еўрапейскай дзяржавы, які мае статус назіральніка ў АПА.

АПА была створаная ў 2006 годзе на сёмай сесіі Асацыяцыі парламентаў Азіі за мір (АПАМ), якая праходзіла ў Тэгеране, яе штаб-кватэра знаходзіцца там жа. АПАМ заснаваная з ініцыятывы Бангладэш у 1999 годзе на Канферэнцыі парламентарыяў Азіі за мір і супрацоўніцтва.

У цэнтры ўвагі АПА — каардынацыя намаганняў нацыянальных парламентаў у вырашэнні актуальных праблем сучаснасці, у тым ліку за кошт павышэння іх ролі ў забеспячэнні міру ў азіяцкім рэгіёне. Старшынства ў АПА ў цяперашні час ажыццяўляе Азербайджан, затым яно пяройдзе да Бахрэйну.

31 ліпеня 2024 года старшыня Палаты прадстаўнікоў Ігар Сяргеенка падчас візіту ў Тэгеран сустрэўся з генеральным сакратаром АПА Махамадам Рэзай Маджыдзі і распавёў яму пра “беларускі парламент і партыйную сістэму“.