На саркафагу ЧАЭС ачагоў тлення не выяўлена — профільнае дзяржагенцтва

23 лютага, Позірк. На саркафагу Чарнобыльскай АЭС ачагоў тлення не выяўлена, паведаміла днём 23 лютага Дзяржаўнае агенцтва Украіны па кіраванні зонай адчужэння.

Супрацоўнікі Дзяржаўнай службы па надзвычайных сітуацыях “працягваюць цеплавізійны маніторынг” канструкцый саркафага (афіцыйная назва — “Новы бяспечны канфайнмент — аб’ект “Сховішча“, НБК-АС).

Па-ранейшаму сцвярджаецца, што “пагаршэння радыяцыйнай абстаноўкі на прампляцоўцы НБК-АС і агулам на ДСП (дзяржаўнае спецыялізаванае прадпрыемства. — “Позірк”.) ЧАЭС не зафіксавана”, “выхаду радыеактыўных рэчываў за ўстаноўленыя межы не выяўлена“.

Увечары 22 лютага агенцтва паведамляла аб працягу “работ па лакалізацыі і ліквідацыі асяродку тлення“ на паўночным баку НБК. Асяродак быў выяўлены ў ноч на 22 лютага.

14 лютага паведамлялася, што беспілотны лятальны апарат урэзаўся ў ахоўную абалонку аркі новага бяспечнага канфайнмента (саркафага) ЧАЭС, уведзенага ў строй у 2019 годзе. Узнікла ўзгаранне.

Дэмакратычны лідар Беларусі Святлана Ціханоўская, якая вырасла на заражанай радыенуклідамі тэрыторыі, заявіла, што “ўзрушаная атакай расійскага беспілотніка” на ЧАЭС.

24 лютага 2022 года, у першы дзень поўнамаштабнага ўварвання ва Украіну, расійскія войскі, якія зайшлі з беларускай тэрыторыі, захапілі ЧАЭС і прабылі там да 31 сакавіка, пасля чаго адступілі ў РФ разам з палоннымі байцамі Нацыянальнай гвардыі, якія ахоўвалі станцыю. У выніку дзеянняў расійскай арміі быў сур’ёзна парушаны працоўны працэс, у тым ліку электразабеспячэнне.