Лукашэнка пра новы склад урада: Кіраўніцтва і вышэйшыя службовыя асобы падлягаюць разгляду

25 лютага, Позірк. Раней у Беларусі ўрад паступова фармаваўся “да выбараў некалькі месяцаў, паўгода, а недзе год”, заявіў Аляксандр Лукашэнка 25 лютага ў Мінску на сустрэчы са старшынёй Савета Рэспублікі Наталляй Качанавай.

“Бачу ўжо ў сродках масавай інфармацыі пачынаюць мусоліць: “Ах, урад! Хто будзе — не будзе…” Яны проста забыліся, журналісты, блогеры і іншыя, асабліва не нашыя, што ўрад фармуецца не пасля выбараў. У нас амаль палова ўжо міністраў, членаў урада працуюць менш, чым год. То бок, гэта зноў прызначаныя людзі”, — цытуе спікера яго прэс-служба.

Разам з тым, падкрэсліў ён, “кіраўніцтва [Савета міністраў] і вышэйшыя службовыя асобы, і іншыя — усё, што ўваходзіць у кампетэнцыю прэзідэнта, — гэтыя людзі падлягаюць разгляду”. Гаворка, паводле яго слоў, таксама пра “шэраг міністраў”.

Спецкамісія, якая фармуе прапановы па новым складзе ўрада, заявіў Лукашэнка, была створаная, каб “меркаванняў было пабольш”.

4 лютага Лукашэнка адзначыў, што “вельмі важна сфармаваць урад моцны, які не будзе хадзіць і плакацца, што там складана, там цяжка. Усюды складана, цяжка і будзе няпроста. Але трэба варушыцца, трэба працаваць”.

Кажучы пра нядаўна прызначаных міністраў, ён заявіў, што “гэта не значыць, што яны атрымалі індульгенцыю”.

“Мне хацелася б, каб не адзін я там росчыркам пяра гэта ўсё рабіў і не паводле той схемы, як гэта звычайна ў нас прынята. Але каб мы атрымалі інфармацыю ў дэталях па ўсім. У вас мусіць быць інфармацыя і ад журналістаў, і ад звычайных людзей, ад каго заўгодна. Усё трэба ўзяць, прааналізаваць для таго, каб унесці адпаведныя прапановы”, — падкрэсліў спікер.

У сярэдзіне лютага дзяржСМІ паведамілі, што кіраўніком камісіі Лукашэнка прызначыў кіраўніка сваёй адміністрацыі Дзмітрыя Крутога.

Апошнім разам міністры прызначаліся 14 студзеня: кіраўніком Міністэрства антыманапольнага рэгулявання і гандлю — Артур Карповіч, Міністэрства па падатках і зборах — Дзмітрый Кійко.

2 снежня 2024 года пасаду міністра культуры заняў Руслан Чарнецкі.