У суд накіраваная справа пецярых беларусаў, якія абвінавачваюцца ў “злачынствах” у складзе палка Каліноўскага
25 лютага, Позірк. Генеральная пракуратура накіравала ў Мінскі гарадскі суд крымінальную справу паводле абвінавачання пецярых грамадзян Беларусі “ў здзяйсненні шэрагу экстрэмісцкіх, тэрарыстычных і іншых злачынстваў”.
Паводле інфармацыі нагляднага органа, ім інкрымінаваны “ўдзел у злачыннай арганізацыі, змова або іншыя дзеянні з мэтай захопу дзяржаўнай улады, акты тэрарызму, наўмыснае прывядзенне ў непрыдатнасць сродкаў чыгуначнага транспарту, удзел у дзейнасці тэрарыстычнай арганізацыі”.
Усе яны праходзяць па працэдуры спецыяльнай вытворчасці.
Паводле матэрыялаў справы, “абвінавачваныя не пазней за жнівень 2020 года ўчынілі шэраг злачынстваў экстрэмісцкай скіраванасці”.
Сцвярджаецца, што адзін з іх у 2021 годзе “добраахвотна ўступіў у склад узброенага фарміравання — 46-га асобнага штурмавага батальёна “Данбас” Узброеных сіл Украіны”, пасля чаго “прайшоў навучанне і іншую падрыхтоўку” і “браў удзел у ваенных дзеяннях на баку ўзброенага фарміравання Украіны ў канфлікце паміж і Данецкай і Луганскай народных рэспублік, з другога боку”.
Паведамляецца таксама, што “мужчына знішчыў выдадзены на яго імя ваенны білет грамадзяніна Рэспублікі Беларусь, здымаючы працэс знішчэння на відэа, пра што пасля размясціў відэазапіс у сетцы інтэрнэт”.
Абвінавачаныя, як сцвярджаецца, “у мэтах ажыццяўлення сумеснай злачыннай дзейнасці на тэрыторыі Украіны, Рэспублікі Беларусь і іншых дзяржаў, а таксама ў мэтах здзяйснення экстрэмісцкіх, тэрарыстычных і іншых злачынстваў для захопу ўлады ў Беларусі ўзброеным шляхам у 2022 годзе ўвайшлі ў склад злачыннай арганізацыі “Полк імя Кастуся Каліноўскага”, у складзе Беларусь”.
Генпракуратура заявіла, што мера стрымання ў выглядзе ўзяцця пад варту ў дачыненні да абвінавачаных “прыменена правільна, падстаў для яе змянення або скасавання няма”. Пры гэтым не ўдакладняецца, вынесена гэтае рашэнне завочна ці фігуранты знаходзяцца ў Беларусі.
Імёны абвінавачаных не называюцца.
Разам з тым 10 снежня 2024 года СК абвясціў спецвытворчасці ў дачыненні да пяці беларускіх добраахвотнікаў, што ваююць ва Украіне, якія маюць дачыненне да палка Каліноўскага (ПКК). Гаворка ішла пра Арцёма Бігеля, Вячаслава Граноўскага, Яну Мельнікаву, Ігната Кірэева, а таксама былога парамедыка ПКК Анастасію Махамет.
13 снежня СК распачаў спецвытворчасць у дачыненні да васьмі беларускіх добраахвотнікаў, якія маюць або мелі дачыненне да ПКК. Аляксей Манчынскі, Раман Яроменка, Павел Кахновіч, Ціхан Клюкач, Яўген Каранкевіч, Аляксандр Пятроўскі, Яўген Салохін, Ягор Іспенькоў абвінавачваюцца паводле розных набораў артыкулаў КК.
Батальён імя Кастуся Каліноўскага быў створаны 9 сакавіка 2022 года. 26 сакавіка таго ж года ён увайшоў у склад Узброеных сіл Украіны, а 21 траўня было абвешчана пра яго трансфармацыю ў полк.
У Беларусі па факце стварэння ПКК узбуджана крымінальная справа, ён прызнаны “экстрэмісцкім фарміраваннем”, любая дапамога структуры або намер яе аказання, жаданне ўступіць у полк жорстка пераследуецца ўладамі.
25 верасня стала вядома, што ПКК прызнаны беларускімі ўладамі “тэрарыстычнай арганізацыяй”. У адказ на гэта полк заявіў, што прызнае “тэрарыстычнай арганізацыяй” рэжым Аляксандра Лукашэнкі.
Спецыяльная вытворчасць — вытворчасць па крымінальнай справе ў дачыненні да абвінавачанага, які знаходзіцца па-за межамі Беларусі і ўхіляецца ад яўкі ў орган, што вядзе крымінальны працэс. Магчымая па 34 складах злачынстваў, якія пераважна адносяцца да катэгорыі цяжкіх і асабліва цяжкіх. Сярод іншага гэта акт тэрарызму, генацыд, наёмніцтва, здрада дзяржаве, дыверсія, стварэнне экстрэмісцкага фарміравання або ўдзел у ім, масавыя беспарадкі, заклікі да санкцый ды інш.