Урад рэалізуе пілотны праект па кансалідацыі паставак у краіны “далёкай дугі“

27 лютага, Позірк. Да 1 чэрвеня будзе рэалізаваны пілотны праект па кансалідацыі тавараў для іх пастаўкі ў краіны Афрыкі, Лацінскай Амерыкі, Паўднёва-Усходняй Азіі і Блізкага Усходу, вынікае з пастановы Савета міністраў ад 25 лютага № 113, апублікаванай на Нацыянальным прававым інтэрнэт-партале.

Прадпрыемства “Белмытнясэрвіс” вызначана адказным за яго рэалізацыю, будзе збіраць заяўкі на перавозку і адпраўляць грузы.

У рамках праекта закупкі транспартна-экспедыцыйных паслуг за кошт уласных сродкаў арганізацый ажыццяўляюцца ў названай арганізацыі з выкарыстаннем працэдуры закупкі з адной крыніцы.

Міністэрствам прамысловасці, лясной гаспадаркі, сельскай гаспадаркі і харчавання, канцэрнам “Беллеспаперапрам“, “Белнафтахім“, “Белдзяржхарчпрам“ і іншым загадана забяспечыць фармаванне і прадстаўленне ў “Белмытнясэрвіс“ партыі тавараў па падначаленых (што ўваходзяць у склад) арганізацыях і гаспадарчых таварыствах для пастаўкі ў краіны “далёкай дугі“. Тое ж тычыцца Беларускай калійнай кампаніі.

Пастанова ўступае ў сілу пасля яе афіцыйнага апублікавання.

Знешнегандлёвы абарот тавараў Беларусі ў 2024 годзе склаў 86 млрд 27,2 млн долараў — на 3,7% больш, чым за 2023-ы (82 млрд 931,8 млн), сведчаць даныя Нацыянальнага статыстычнага камітэта.

Экспарт за год дасягнуў 40 млрд 327,3 млн долараў (39 млрд 840,1 млн; +1,2%), імпарт — 45 млрд 699,9 млн (43 млрд 91,7 млн; +6,1%). Адмоўнае сальда склала 5 млрд 372,6 млн долараў (па выніках 2023 года было -3 млрд 251,6 млн; +65,2%).

З краінамі СНД Беларусь нагандлявала на 55 млрд 93,2 млн долараў (51 млрд 508,9 млн; +7%): экспарт — 28 млрд 804,5 млн (27 млрд 192,9 млн; +5,9%), імпарт — 26 млрд 288,7 млн (24 млрд 316 млн; +8,1%). Дадатнае сальда — 2 млрд 515,8 млн (2 млрд 876,9 млн; зменшылася ў гадавым вымярэнні на 12,6%).

З іншымі дзяржавамі гандаль таварамі склаў 30 млрд 934 млн долараў (31 млрд 422,9 млн; -1,6%): экспарт — 11 млрд 522,8 млн (12 млрд 647,2 млн; -8,9%), імпарт — 19 млрд 411,2 млн (18 млрд 775,7 млн; +2,6%). Адмоўнае сальда — 7 млрд 888,4 млн (-6 млрд 128,5 млн; +28,7%).

Падрабязныя даныя па асобных краінах Белстат не публікуе.

На пасяджэнні ўрада летась 20 снежня прэм’ер-міністр Раман Галоўчанка заявіў, што “актыўна ідзе дыверсіфікацыя экспартных патокаў”: “За дзевяць месяцаў экспарт у краіны Афрыкі вырас у 3,7 раза, а колькасць афрыканскіх краін — пакупнікоў беларускай прадукцыі ўзрасла да 45”.

У 2024 годзе беларускі экспарт у краіны Афрыкі, паводле афіцыйных звестак, дасягнуў рэкордных 600 млн долараў.

Пераарыентацыя экспартных паставак з заходняга напрамку звязана з уведзенымі ЕС і ЗША санкцыямі супраць Мінска.