Мінск узмацніў прапаганду, прадстаўляючы Вільнюc пагрозай Беларусі — аналітыкі літоўскай арміі

28 лютага, Позірк. Аб павелічэнні ў 2024 годзе прапагандысцкіх паведамленняў Масквы і Мінска, якія запалохваюць грамадзян Літвы ядзернай зброяй, заявілі на брыфінгу 27 лютага прадстаўнікі Дэпартамента стратэгічных камунікацый літоўскага войска, піша Delfi.

“Мы бачым актыўныя пагрозы ядзернай зброяй і выяву Літвы як краіны, якая ўяўляе пагрозу Калінінграду і Беларусі”, — адзначыў кіраўнік падраздзялення Гедрус Валінтэліс.

Паводле слоў аналітыка структуры Інгрыды Норкутэ, “адной з новых тэндэнцый мінулага года з’яўляецца ўзмацненне прапагандысцкіх паведамленняў з беларускага боку”: “Калі мы паглядзім на паведамленні беларускага боку, то яны былі вельмі сканцэнтраваны на меркаваным ворага. Нельга выключаць, што для пранікнення ў заходнюю [інфармацыйную] прастору выкарыстоўваюцца моцныя, радыкальныя пагрозы, таму што такія гучныя заявы часта транслююцца”.

Акрамя гэтага, дадала яна, прапагандысты працягвалі распаўсюджваць паведамленні, якія прадстаўляюць Літву як “нязначную дзяржаву, якая не адбылася, але таксама і як патэнцыйнага агрэсара, які ўяўляе пагрозу для Саюзнай дзяржавы”.

“На падставе апытанняў грамадскай думкі мы бачым, што літоўскае грамадства ўстойлівае да прапаганды, — адзначыў Валінтэліс. — Грамадзяне Літвы разумеюць, што гэта такое, яны разумеюць, што супраць іх выкарыстоўваецца ўплыў. Гэта сведчыць аб плёне шматгадовай працы і аб тым, што адной прапагандай Літву не запалохаеш”.

З рэзкімі выказваннямі, накіраванымі супраць Вільнюса, выступіў Аляксандр Лукашэнка ў дзень прэзідэнцкіх выбараў 26 студзеня: “Няма Літвы. Яны (улады, — “Позірк”.) яе знішчылі. Выдатную краіну. Працавіты народ, цярплівы. У савецкія часы – “пад акупацыяй”, як яны кажуць, – яна дасягнулі такіх вышынь! Я бываў у Літве. Людзі ў чарзе стаялі, каб набыць тэхніку, прадукты харчавання з Літвы. Мы марылі жыць так, як жывуць прыбалтыйскія рэспублікі“.

Паводле яго, жывучы “ў дэмакратыі“, Літва пазбавілася вялікай часткі насельніцтва: “У іх жа людзей не засталося. Вунь “дэмакратыі” сербанула і Ўкраіна“.

Беларусь разглядае працэсы, якія адбываюцца ля сваіх заходніх межаў, як “падрыхтоўку да нападу на Саюзную дзяржаву з мэтай яе разбурэння і жаданне рэалізаваць рэваншысцкія настроі ў дачыненні да Беларусі і Расіі”, заявіў начальнік Дэпартамента міжнароднага ваеннага супрацоўніцтва Міністэрства абароны Валерый Равенка на брыфінгу для замежных ваенных аташэ 20 лютага.

Адаптаваная да “новых рэалій” дзяржаўная палітыка Расіі “дапускае магчымасць прымянення ядзернай зброі ў адказ на агрэсію супраць Беларусі”, заявіў міністр абароны РФ Андрэй Белавусаў 23 кастрычніка мінулага года ў Мінску.

Расійская тактычная ядзерная зброя, паводле афіцыйнай інфармацыі, размешчана ў Беларусі ў мінулым годзе.