На пажары ў Бешанковіцкім раёне загінулі бацька і сын-інвалід

28 лютага, Позірк. За мінулыя дзяжурныя суткі (з 6 гадзін 27 лютага да 6 гадзін 28 лютага) ахвярамі пажараў сталі тры чалавекі, сведчаць звесткі Міністэрства па надзвычайных сітуацыях. Усе выпадкі гібелі людзей зафіксаваныя ў Віцебскай вобласці.

У вёсцы Ганкавічы Бешанковіцкага раёна агонь забраў жыцці бацькі (1949 года нараджэння) і сына (1981), інваліда другой групы. Іх целы былі выяўленыя пад канструкцыямі, якія абрынуліся.

У вёсцы Краўцы Верхнядзвінскага раёна загінуў мужчына, меркавана гаспадар жылля (1987).

З пачатку 2025 года ў краіне здарылася 1.216 пажараў — на 32,6% больш, чым за той жа перыяд 2024-га (917). Загінула 159 чалавек (+39,5%; 114), траўмавана — 81 (-12%; 92).

На пасяджэнні калегіі МНС, якое прайшло 14 лютага, кіраўнік ведамства Вадзім Сіняўскі сцвярджаў, што ў 2024 годзе ў краіне былі “забяспечаныя бяспечныя ўмовы жыццядзейнасці насельніцтва, аператыўнае рэагаванне на надзвычайныя сітуацыі і эфектыўная ліквідацыя іх наступстваў”.

Паводле слоў чыноўніка, у выніку “сумеснай прафілактычнай работы” колькасць загінулых на пажарах летась “не перавысіла сярэднегадавы паказчык за апошнія пяць гадоў”. Разам з тым, канстатаваў Сіняўскі, меры, якія прымаюцца, не дазволілі захаваць дасягнутую ў 2022 і 2023 гадах дынаміку зніжэння колькасці пажараў і загінулых ад іх людзей.

Дзяржсакратар Савета бяспекі Аляксандр Вальфовіч заявіў на калегіі, што яго “ў першую чаргу“ хвалюе “колькасць пажараў, якія здараюцца ў нашай краіне“. “Можа быць, нават не па віне працы МНС, а па віне нашых грамадзян, якія неасцярожна звяртаюцца з агнём: гэта і парушэнне правілаў выкарыстання бытавой тэхнікі, гэта і курэнне, гэта і, на жаль, ужыванне алкаголю”, — сказаў Вальфовіч.