BEROC прагназуе паскарэнне інфляцыі пры паслабленні коштавага рэгулявання
2 сакавіка, Позірк. Гадавая інфляцыя застанецца ў межах 5,5% у бліжэйшыя месяцы, але можа паскорыцца да 6–8% на працягу года, калі ўлады пойдуць на паслабленне цэнавага рэгулявання, гаворыцца ў “Экспрэс-аналізе” даследчага цэнтра BEROC.
Інфляцыя “заставалася стрыманай” у студзені: гадавы паказчык склаў 5,15%, гаворыцца ў матэрыяле: “Як і ў папярэднія месяцы, абмежавальнае ўздзеянне на інфляцыю аказвала слабая дынаміка яе небазавага кампанента (адміністратыўна рэгуляваныя цэны і тарыфы і цэны на плодаагароднінную”.
“Драйверам інфляцыі ў яе базавых катэгорыях” заставаліся нерэгулюемыя паслугі, цэны на якія падняліся амаль на 12% (месяц да месяца) у студзені 2025 г. (без уліку міжнародных чыгуначных і авіяперавозак).
Паводле даных Белстата, спажывецкія цэны ў студзені 2025 года выраслі на 0,7%. Харчовыя тавары падаражэлі на 1%, паслугі — на 0,4%; нехарчовыя тавары — на 0,5%.
У гадавым вымярэнні (да студзеня 2024-га) цэны павялічыліся на 5,2%. Харчаванне стала даражэй на 6,5%, нехарчовыя тавары — на 3,3%, паслугі — на 5,2%.
Рост цэн на садавінагародніную прадукцыю (сезонныя тавары) у мінулым месяцы склаў 2,7% (снежні — 5,2%, лістападзе — 4,7%).
Рэгуляваныя дзяржавай цэны і тарыфы выраслі на 4% (4,4%, 5,1%).
У 2024 годзе спажывецкія цэны ў Беларусі выраслі на 5,16% (сёмае менста на тэрыторыі былога СССР), у 2023-м — на 5,84% (пятае), у 2022-м — на 12,83% (дзявятае), у 2021-м — на 9,2% (пятае), за апошнія пяць гадоў — на 48,27%, з улікам студзеня 2025 года — на 49,29%.
Жорсткае цэнавае рэгуляванне ўведзена ў кастрычніку 2022 года. Яно датычыцца ўсяго спажывецкага кошыка. Пазней з тэматычнай пастановы ўрада былі выключаны некаторыя групы тавараў, падкарэктаваны правілы рэгулявання цэн.
З восені мінулага года Саўмін рыхтуе змякчэнне правіл.
У 2024 годзе вытворцы больш за тысячу разоў прасілі дзяржорганы аб павышэнні цэн — выдадзены 572 дазволы, паведаміў 10 лютага міністр антыманапольнага рэгулявання Артур Карповіч.
На тэматычнай нарадзе 28 лютага Аляксандр Лукашэнка даручыў ураду да красавіка вызначыцца з новай сістэмай рэгулявання цэн.
Паводле яго сцвярджэння, у Беларусі цэны “самыя нізкія ў свеце”.
Мэты ўладаў па прыросту ВУП на 4,1% і інфляцыі да 5% у 2025 годзе выглядаюць няўзгодненымі — BEROC
18 лютага, Позірк. Унутраная эканамічная палітыка застаецца крыніцай рызык для макраэканамічнай збалансаванасці, а мэты па прыросту эканомікі на 4,1% і інфляцыі ў межах 5% сёлета выглядаюць няўзгодненымі. Такое меркаванне выказаў старшы навуковы супрацоўнік даследчага цэнтра BEROC Анатоль Харытончык на брыфінгу …