Год пачаўся з падзення аб’ёму экспарту тавараў і трохразовага росту адмоўнага сальда

5 сакавіка, Позірк. Знешнегандлёвы абарот тавараў Беларусі ў студзені 2025 года склаў 5 млрд 957,3 млн долараў — на 5,1% менш, чым за першы месяц 2024-га, вынікае з даных Нацыянальнага статыстычнага камітэта.

Экспарт склаўся на ўзроўні 2 млрд 726,5 млн (-11,5% у гадавым вымярэнні), імпарт — 3 млрд 230,8 млн (+1%).

Паводле даных Белстата, знешнегандлёвы абарот тавараў у 2024 годзе склаў 86 млрд 27,2 млн долараў (+3,7% да 2023 года, калі было 82 млрд 931,8 млн). Экспарт за год дасягнуў 40 млрд 327,3 млн долараў (+1,2%; 39 млрд 840,1 млн), імпарт — 45 млрд 699,9 млн (+6,1%; 43 млрд 91,7 млн). Адмоўнае сальда склала 5 млрд 372,6 млн долараў (па выніках 2023 года было -3 млрд 251,6 млн +65,2%).

Пры гэтым у студзені 2024 года адмоўнае сальда складала 166,1 млн долараў, а ў студзені 2025-га яно дасягнула 504,3 млн, гэта значыць павялічылася ўтрая.

19 лютага прэм’ер-міністр Раман Галоўчанка на пасяджэнні ўрада на тэму падвядзення вынікаў сацыяльна-эканамічнага развіцця Беларусі за 2024 год заявіў, што афіцыйна пастаўленая задача павялічыць экспарт тавараў і паслуг на 7,6% да ўзроўню 2023 года не выкананая.

Паводле слоў прэм’ера, аб’ём экспартных паставак вырас на 1 млрд 700 млн доллараў (+3,5%).