Банкі Беларусі, выдаючы крэдыты прадпрыемствам РФ, шкодзяць эканоміцы сваёй краіны — СВР Украіны

5 сакавіка, Позірк. Напрыканцы 2024 года банкі Беларусі выдалі расійскім прадпрыемствам крэдытаў на суму не менш як 500 млн долараў, заяўляе Служба знешняй выведкі (СВВ) Украіны.

У ведамстве лічаць, што “такая палітыка беларускіх банкаў прыводзіць да недахопу крэдытных рэсурсаў для сваіх нацыянальных кампаній і абмежавання інвеставання эканомікі краіны”.

У матэрыяле, названым “Расіяне абяскроўліваюць банкаўскую сістэму РБ”, СВВ адзначае, што кампаніям з РФ “выгадна браць крэдыты ў беларускіх банках”. “Прычына вельмі простая — значная розніца ва ўліковых стаўках цэнтрабанкаў — 21% у РФ супраць 9,5% у Беларусі. Таксама розніца паміж працэнтнымі стаўкамі ў Беларусі і Расіі (каля 17% супраць 27% па крэдытах і 11% супраць 21% па дэпазітах) дазваляе нават зарабляць на розніцы паміж імі”, — падкрэслівае ведамства.

У прыватнасці, лічаць ва ўкраінскай выведцы, “некаторыя расійскія кампаніі выкарыстоўваюць наступную схему: бяруць крэдыт у беларускіх банках пад 17% і размяшчаюць гэтыя сродкі ў расійскіх банках пад 21%, зарабляючы на розніцы паміж працэнтамі па крэдытах і дэпазітах”.

Такім чынам, робіць выснову ведамства, “беларускія банкі фактычна фінансуюць расійскую эканоміку, у тым ліку і ў вайне супраць Украіны, садзейнічаюць зніжэнню ліквіднасці сваёй банкаўскай сістэмы; паскараюць тэмпы інфляцыі і змяншаюць патэнцыял беларускай эканомікі”.

Напрыканцы лютага прадстаўнік банкаўскага сектара Беларусі, які пажадаў застацца ананімным, адзначаў у артыкуле для бюлетэня даследчага цэнтра BEROC, што “ў снежні ў агульнай складанасці было выдадзена не менш як 0,5 млрд долараў кампаніям з РФ пад даручальніцтва або забеспячэнне расійскіх банкаў”.

“Для беларускіх фінустаноў такія здзелкі выгадныя: яны забяспечваюць гарантаванае вяртанне сродкаў практычна з нулявой рызыкай. Акрамя таго, яны патрабуюць менш намаганняў, чым крэдытаванне нават буйных і плацежаздольных беларускіх кампаній, паколькі адсутнічае неабходнасць у закладзе, ацэнцы актываў і правядзенні фінансавага аналізу”, — патлумачыў эксперт.

Разам з тым, адзначыў ён, гэта ўзмацняе канкурэнцыю за пазыковыя сродкі на рынку, якую беларускі бізнес далёка “не заўсёды здольны вытрымаць”. Разыходжанне ў абранай манетарнай палітыцы прывяло да “адчувальнай розніцы па стаўках у камерцыйных банках Беларусі і РФ: каля 17% супраць прыкладна 27% па крэдытах і 11% супраць 21% па дэпазітах”.

“Бізнес бачыць у гэтым магчымасць зарабіць на арбітражы ставак да 4–5% гадавых. Такім чынам, асобныя кампаніі, якія маюць свае гандлёвыя прадстаўніцтвы ў Расіі, карыстаюцца адкрытымі ў сувязі з гэтым магчымасцямі. Напрыклад, фінансуюцца ў Беларусі пад 17% і размяшчаюць сродкі ў Расіі пад 21%. Як варыянт, крыху затрымліваюць паступленне валютнай выручкі ў Беларусь”, — адзначыў аўтар.

На яго думку, пакуль беларускія банкі абслугоўваюць патрабаванні кампаній з РФ, грошы “не працуюць на айчынны бізнес і эканоміку”. Гэта ў сваю чаргу “вядзе да росту сабекошту беларускіх тавараў, што здольна сур’ёзна раскруціць інфляцыйны віток”.