Беларусь захоўвае “лідарства” па колькасці журналістаў, якія знаходзяцца ў зняволенні — даклад СЕ
5 сакавіка, Позірк. Па выніках 2024 года Беларусь захавала “лідарства” сярод краін Еўропы па колькасці журналістаў, якія знаходзяцца ў зняволенні, на 31 снежня іх было 44. Такія даныя прыводзяцца ў штогадовым дакладзе арганізацый — партнёраў платформы Савета Еўропы (СЕ) па садзейнічанні абароне журналістыкі і бяспекі журналістаў.
У аналагічным дакладзе за 2023 год паведамлялася пра 37 журналістаў у зняволенні (гэта таксама быў самы высокі паказчык у Еўропе). Такім чынам, за год іх колькасць павялічылася на 18,9%.
Адзначаецца, што на 31 снежня 2024 года 30 журналістаў знаходзілася ў зняволенні ў Азербайджане, 29 — у Расіі, 28 — на акупаваных тэрыторыях Украіны, 27 — у Турцыі і 1 — у Грузіі.