У рамках праверкі боегатоўнасці арміі на зборы прызвана 5 тыс. ваеннаабавязаных — Муравейка

5 сакавіка, Позірк. У рамках праверкі боегатоўнасці Узброеных сіл з запасу на зборы прызвана каля 5 тыс. ваеннаабавязаных, паведаміў начальнік Генеральнага штаба УС — першы намеснік міністра абароны Павел Муравейка.

Паводле яго слоў, якія перадае прэс-служба Міністэрства абароны, асноўныя задачы праверкі на сёння выкананы “ў поўным аб’ёме”.

Ваеннаабавязаныя, адзначыў Муравейка, “атрымалі сур’ёзную практыку падрыхтоўкі або аднаўлення [воінскіх] навыкаў”, у рамках праверкі адпрацаваныя “вучэбна-баявыя задачы сучасныя прыёмы вядзення баявых дзеянняў, выкарыстання беспілотнай авіяцыі, сродкаў радыёэлектроннай барацьбы”.

“Актыўна выкарыстоўваем прыёмы контрбатарэйнай барацьбы, вядзення рэйдавых дзеянняў, дзеянні штурмавых груп, абароны населеных пунктаў, дзеянні ў лясіста-балоцістай мясцовасці. Гэта тыя аспекты, якія трэба перыядычна аднаўляць і трэніраваць у сучасных будучых абаронцаў Айчыны і ваенна-навучанага рэзерву. Акрамя таго, мы атрымалі вельмі цікавыя зрэзы і вельмі цікавыя вынікі для таго, каб на перспектыву разгледзець пытанні ўдасканалення баявой мабілізацыйнай гатоўнасці нашых Узброеных сіл і нашых злучэнняў і воінскіх часцей”, — сказаў кіраўнік Генштаба.

“Сітуацыя ля нашых межаў няпростая, — паўтарыў традыцыйны наратыў беларускіх уладаў Муравейка. — За апошнія гады рэзка ўзрос працэс мілітарызацыі сумежных краін. Там павялічылася ў два, а то і ў тры разы колькасць праводзімых вучэнняў, прычым тэматыка, якую яны адпрацоўваюць, у асноўным наступальная і звязаная з агрэсіўным ужываннем або дзеяннямі ў тых ці іншых напрамках. Узрос склад кантынгентаў, які размешчаны паблізу нашых межаў”.

Зараз, паводле сцвярджэння ваеначальніка, на тэрыторыі Польшчы і краін Балтыі, акрамя нацыянальных воінскіх кантынгентаў, размяшчаюцца 17 батальённых тактычных груп НАТО і ЗША, прычым “яны маюць дастаткова сур’ёзнае ўзбраенне і ваенную тэхніку”. Акрамя гэтага, “развіваецца інфраструктура, якая дазваляе аператыўна перакідваць з аднаго канца краіны ў іншы пэўныя групоўкі”.

“Увесь час вядзецца выведка нашай тэрыторыі, прычым яе інтэнсіўнасць узрасла ў параўнанні з 2020 годам прыкладна ў пяць разоў, — заявіў начальнік Генштаба. — Калі раней мы фіксавалі два-тры самалётавылета на тыдзень, то цяпер гэта дасягае прыкладна пяці-шасці, часам да дзесяці самалётавылетаў, якія цалкам манітораць нашу тэрыторыю, вывучаюць. Актывізавалася спадарожнікавая выведка — мы таксама фіксуем, што спадарожнікі з пэўнай перыядычнасцю праглядаюць нашу тэрыторыю ў розных яе ракурсах”.

“Гэта не дадае аптымізму, — сказаў Муравейка, — але прымушае нас прымаць пэўныя рашэнні па развіцці і ўдасканаленні сваёй бяспекі. Гэта пытанні развіцця нашага абаронна-прамысловага комплексу: зроблена стаўка, і абаронна-прамысловы комплекс мае выразныя задачы па развіцці і стварэнні сучасных сістэм узбраення, развіцці беспілотнай авіяцыі, мы актыўна заказваем новыя ўзоры, элементы ўзбраення, гэта значыць зброя, прыцэлы, боепрыпасы, тэхніку і гэтак далей”.

Беларусь, паводле слоў кіраўніка Генштаба, “трэба рыхтаваць да абароны”. “І таму праводзім такія раптоўныя праверкі. Мы маем пэўны рэсурс, які нам выдзелены ўрадам для таго, каб забяспечыць падрыхтоўку ваенна-навучанага рэзерву. Пры гэтым ніхто не кажа пра тое, што мы там парушаем нейкія эканамічныя працэсы і сувязі — усе суб’екты гаспадарання з разуменнем ставяцца да падобных мерапрыемстваў”, — адзначыў Муравейка.

Праверка боегатоўнасці арміі праводзіцца ў Беларусі з 3 лютага.

Рэжым Лукашэнкі безупынна праводзіць вучэнні, трэніроўкі, зборы на фоне абвастрэння адносін з Захадам і поўнамаштабнай вайны Расіі супраць Украіны, у якой афіцыйны Мінск падтрымлівае Крэмль.

У лютым 2022 года ўварванне было ажыццёўлена ў тым ліку з беларускай тэрыторыі.