Прадстаўленую Беларускім фондам спартыўнай салідарнасці антываенную дэкларацыю падпісалі каля 130 чалавек

11 траўня, BPN. Антываенную дэкларацыю, прадстаўленую Беларускім фондам спартыўнай салідарнасці (BFSS) на фоне вайны ва Украіне, падпісалі каля 130 чалавек, паведаміў BPN выканаўчы дырэктар фонду Аляксандр Апейкін.

Тыя, хто далучыўся да гэтай ініцыятывы, аддаюць свой голас за “неадкладнае спыненне агрэсіі, развязанай Расійскай Федэрацыяй супраць Украіны з выкарыстаннем тэрыторыі Рэспублікі Беларусь”.

Асноўнай мэтай кампаніі BFSS называе “аб’яднанне сусветнага спорту, які выступае супраць вайны ва Украіне”. “Гэтая вайна знішчае ўкраінскія гарады, забірае жыцці тысяч мірных жыхароў і сотняў дзяцей, мільёны людзей становяцца ўцекачамі. Пад пагрозу пастаўлена бяспека ўсяго еўрапейскага рэгіёну і нават свету. Гэтаму няма ніякіх апраўданняў”, — гаворыцца ў дакуменце.

У тэксце гучыць заклік да “правядзення міжнароднага расследавання і прыцягнення да адказнасці ўсіх вінаватых за здзейсненыя міжнародныя ваенныя злачынствы і злачынствы супраць чалавецтва”, а таксама патрабаванне “спынення ваенных дзеянняў супраць Украіны, вываду войскаў з яе тэрыторыі і тэрыторыі Беларусі”.

Для збору подпісаў створаны сайт antiwar-declaration.org.

Сярод тых, хто далучыўся да ініцыятывы, шмат вядомых беларускіх спартоўцаў і трэнераў, у тым ліку Аляксандр Хацкевіч, Андрэй Краўчанка, Надзея Астапчук, Артур Удрыс, Сцяпан Папоў, Сяргей Далідовіч, Дзмітрый Шэршань, Віталь Гуркоў, Ілья Шкурын, Святлана Кудзеліч, Яна Максімава, Іван Ганін, Алег Дулуб, Наталля Лешчык, Сямён Букін, Андрэй Чэпа, Міхаіл Залеўскі і іншыя.

Кампанію падтрымалі таксама спартоўцы з іншых краін, у прыватнасці былыя футбалісты зборнай Украіны Андрэй Варонін, Яўген Селязнёў, экс-футбаліст зборнай Узбекістана Максім Шацкіх, футбаліст зборнай Славеніі Беньямін Вербіч.

“Мы хочам, каб спартыўная супольнасць выказала кансалідаваную пазіцыю адносна вайны ва Украіне, — адзначыў Апейкін. — Многія спартоўцы выступаюць супраць расійскай агрэсіі, але яны робяць гэта дэцэнтралізавана, у сацсетках. Антываенная дэкларацыя — гэта адзіная пляцоўка, на якой сваім подпісам спартовец мае магчымасць далучыцца да нашага антываеннага руху. І яго подпіс застанецца ў гісторыі”.

На думку кіраўніка фонду, працэс збору подпісаў “набірае нядрэнныя абароты”. У BFSS разлічваюць, што акрамя атлетаў з краін СНД у ініцыятыву неўзабаве будуць “больш масава ўцягнуты еўрапейскія спартоўцы”.

“Ужо сабрана каля 120–130 подпісаў. Падпісваецца вельмі шмат беларускіх і ўкраінскіх спартсменаў. Гэта важна для будучых беларуска-ўкраінскіх адносін”, — мяркуе Апейкін.

Фонд не арыентуецца на пэўную колькасць падпісантаў, але разлічвае, што “іх будуць тысячы”. У такім выпадку “антываенная дэкларацыя можа стаць практыкаванай нормай у спорце”. І тады будзе вельмі важна, што менавіта “беларусы сталі ініцыятарамі гэтага руху”.

Сярод тых, хто далучыўся да кампаніі, пакуль няма дзейных беларускіх атлетаў, якія знаходзяцца на радзіме. Аднак, не выключае Апейкін, у хуткім часе “яны таксама ўсвядомяць важнасць падпісання дэкларацыі”.

“Магчыма, у будучыні наяўнасць подпісу пад антываеннай дэкларацыяй будзе адным з ключавых фактараў, якія дадуць магчымасць беларускім спартоўцам выступаць на міжнароднай арэне, — патлумачыў кіраўнік BFSS. — Зразумела, гэта не юрыдычны дакумент, і ён не можа даваць гарантыі. Аднак падпісанне дэкларацыі можа стаць падставай для хадайніцтва аб допуску атлета да міжнародных спаборніцтваў”.

“Гэта важна, паколькі ў бліжэйшыя некалькі гадоў на ўвесь беларускі спорт будзе распаўсюджвацца міжнародны “бан” (дыскваліфікацыя з-за вайны ва Украіне — BPN.)”, — перакананы Апейкін.

Пасля ваеннага ўварвання Расіі ва Украіну з выкарыстаннем тэрыторыі Беларусі многія беларускія спартоўцы былі адхіленыя ад міжнародных спаборніцтваў.