Ціханоўская — украінцам: Трэба дапамагаць адзін аднаму, не марнаваць час, высвятляючы адносіны

26 ліпеня, BPN. “Цяпер, як ніколі раней, беларусам і ўкраінцам трэба аб’ядноўвацца. Трэба дапамагаць адзін аднаму. Не марнаваць час, высвятляючы адносіны”, — заявіла 25 ліпеня на мітынгу ў падтрымку Украіны ў Вільнюсе беларускі дэмакратычны лідар Святлана Ціханоўская.

Яна таксама заклікала “не спісваць галоўныя рашэнні на realpolitik”.

“Калі я кажу, што зараз у беларусаў і ўкраінцаў агульны вораг і агульная мэта, я кажу гэта не толькі як палітык, — цытуе Ціханоўскую яе прэс-служба. — Я кажу гэта як маці. Таму што абодва дыктатары знішчаюць нашых дзяцей, нашы дамы і нашу будучыню”.

Экс-кандыдат у прэзідэнты заўважыла, што “без свабоднай Украіны не будзе свабоднай Беларусі”. “Але і без свабоднай Беларусі не можа быць бяспечнай Украіны і ўсяго рэгіёна”, — дадала яна.

Лідар дэмсіл прапанавала “не рабіць высновы толькі паводле слоў палітычных лідараў”, паколькі “гэта не дапамагае нашым дзецям хутчэй убачыць бацькоў”.