Выйшлі на волю палітзняволеныя ўдзельнікі гурта Irdorath Уладзімір і Надзея Калач

21 красавіка, BPN. Выйшлі на волю палітвязні ўдзельнікі неафолк-групы Irdorath Уладзімір і Надзея Калач, паведамляе праваабарончы цэнтр “Вясна”.

У снежні 2021 года яны былі прыгавораны да двух гадоў пазбаўлення волі з адбываннем пакарання ў калоніі агульнага рэжыму, прызнаўшы вінаватымі па ч. 1 і ч. 2 арт. 342 Крымінальнага кодэкса (арганізацыя і падрыхтоўка дзеянняў, якія парушаюць грамадскі парадак, навучанне або іншая падрыхтоўка асоб для ўдзелу ў такіх дзеяннях, а таксама фінансаванне або іншае матэрыяльнае забеспячэнне такіх дзеянняў).

Муж і жонка Уладзімір і Надзея Калач, а таксама яшчэ 14 чалавек былі затрыманыя 2 жніўня 2021 года на святкаванні дня нараджэння Надзеі.

Спачатку ўсіх абвінавачвалі ў непадпарадкаванні міліцыі за тое, што яны не адчынялі вароты дома пад Мінскам. Пазней стала вядома, што супраць шасцярых затрыманых узбуджана крымінальная справа.

Музыкі гурта Пётр і Юлія Марчанка, а таксама Антон Шніп былі асуджаныя на паўтара гады пазбаўлення волі ў калоніі агульнага рэжыму і вызваленыя ў кастрычніку мінулага года.