Белстат: ВУП за студзень — кастрычнік 2023 года вырас на 3,8%

17 лістапада, Позірк. Аб’ём валавога ўнутранага прадукту за студзень — кастрычнік 2023 года ў бягучых цэнах склаў 179,2 млрд рублёў, паведамляе Нацыянальны статыстычны камітэт. У супастаўных цэнах да ўзроўню аналагічнага перыяду 2022 года ВУП вырас на 3,8%.

У 2022 годзе ВУП знізіўся на 4,7%, у студзені 2023-га да студзеня 2022-га — на 5%, у студзені — лютым да аналагічнага леташняга перыяду — на 3,6%, у першым квартале — на 2,1%, у студзені — красавіку — на 0,6%, у студзені — траўні — вырас на 0,9%, у першым паўгоддзі — на 2%, у студзені — ліпені — на 2,9%, у студзені — жніўні — на 3,1% , у студзені — верасні — на 3,5%.

Сёння “аднаўляюцца практычна ўсе сектары” беларускай эканомікі, заявіў журналістам міністр эканомікі Аляксандр Чарвякоў 15 лістапада пасля пасяджэння Савета міністраў.

“Вядомыя папярэднія звесткі працы эканомікі за дзесяць месяцаў, — сказаў чыноўнік. — Мы падышлі да планавай задачы сёлета на 3,8%, гэта значыць у нас апераджэнне ўзроўню ВУП, які перад намі ставіўся”.

На яго думку, гэта было зроблена за кошт “мабілізацыі рэзерваў, якія знаходзіліся ў сектарах эканомікі”.

“Мы цалкам кампенсавалі страты на знешнім рынку. У цэлым эканоміка развіваецца стабільна і ўстойліва. Мы захаваем гэты ўзровень [да канца года], і можна будзе сказаць, што мы выканалі задачу”, — сцвярджае міністр.

Згодна з зацверджанымі Лукашэнкам найважнейшымі параметрамі прагнозу сацыяльна-эканамічнага развіцця Беларусі на 2023 год, прырост ВУП запланаваны на ўзроўні 3,8%.

На думку аналітыкаў Еўрапейскага банка рэканструкцыі і развіцця, у Беларусі ў 2023 годзе “чакаецца зніжэнне ВУП на 1%, за якім рушыць услед умеранае аднаўленне ў 2024 годзе з ростам на 1,3% пры наяўнасці значных рызык зніжэння”.

Агенцтва Fitch Ratings лічыць, што краіну “чакае далейшая рэцэсія”: скарачэнне ВУП у 2023 годзе складзе 1,3%, у 2024‑м — 0,3%.

Сусветны банк у вясновым аглядзе спрагназаваў, што беларуская эканоміка па выніках года вырасце на 0,6%, аднак у восеньскім прагнозе гэты паказчык быў павялічаны да 3%. Паводле прагнозу экспертаў, па выніках 2024 года рост ВУП Беларусі складзе 0,8%, 2025-га — 0,7%.