У Мазырскім пагранічным атрадзе салдат здзейсніў самагубства
Фота мае ілюстрацыйны характар
12 снежня, Позірк. На тэрыторыі пагранічнай заставы “Роза Люксембург” Мазырскага пагранічнага атрада (Ельскі раён Гомельскай вобласці) 11 снежня знойдзена цела вайскоўца 2003 года нараджэння з прыкметамі суіцыду, паведамляе сайт падраздзялення.
Малады чалавек быў прызваны на тэрміновую службу ў траўні 2023 года.
На месцы здарэння працуе следча-аператыўная група. “Прычыны здарэння высвятляюцца”, — гаворыцца ў паведамленні.
Кіраўніцтва Дзяржпагранкамітэта і камандаванне Мазырскага пагранічнага атрада “выказваюць спачуванні родным і блізкім ваеннаслужачага”.
Мазырскі пагранатрад створаны ў лістападзе 2014 года. Асабісты склад ахоўвае ўчастак мяжы з Украінай працягласцю больш за 370 км. У складзе атрада 6 лінейных пагранзастаў, 3 пагранпасты, рэзервовая застава, 4 аддзяленні пагранічнага кантролю. У адным будынку з заставай “Роза Люксембург” месціцца пагранзастава “Хаменкі”.
Сёлета было некалькі выпадкаў суіцыду ў беларускім войску.
У ноч на 4 жніўня ў 72-м аб’яднаным навучальным цэнтры (вайсковы гарадок Печы ў Барысаве, Мінская вобласць) застрэліўся салдат тэрміновай службы, паведамляў “Флагшток” са спасылкай на таварыша загінулага па службе. Паводле слоў крыніцы, той шукаў спосабы пазбегнуць прызыву ў войска, але беспаспяхова.
10 красавіка ў Брэсце застрэліўся 20-гадовы тэрміновец, які служыў у 38-й Брэсцкай асобнай дэсантна-штурмавой брыгадзе, паведамляў партал “Зеркало”. Чалавек, знаёмы з сітуацыяй, распавёў, што хлопец адслужыў мінімум паўгода.
Цела вайскоўца “з прыкметамі суіцыду” было знойдзена 20 сакавіка ў памяшканні аддзялення пагранкантролю “Высока-Літоўск” на беларуска-польскай мяжы. Пра гэта паведамляў Дзяржпагранкамітэт.
Аддзяленне месціцца ў вёсцы Абяроўшчына (Камянецкі раён Брэсцкай вобласці). Паводле інфармацыі ведамства, шэраговец 2003 года нараджэння быў прызваны ў кастрычніку 2022-га і праходзіў службу ў Брэсцкай пагрангрупе.