У ЕС увядуць крымінальную адказнасць за парушэнне санкцый — Латушка
25 снежня, Позірк. Еўрапейскі савет і Еўрапейскі парламент 12 снежня прыйшлі да пагаднення аб неабходнасці ўвядзення крымінальнай адказнасці за парушэнне санкцый ЕС, заявіў намеснік кіраўніка Аб’яднанага пераходнага кабінета (АПК), кіраўнік Народнага антыкрызіснага ўпраўлення (НАУ) Павел Латушка.
“Чакаецца хуткае зацвярджэнне гэтай дырэктывы дзяржавамі — членамі ЕС”, — сказаў палітык 25 снежня ў відэазвароце на сваім ютуб-канале.
Паводле яго слоў, “гэтая дырэктыва гарантуе, што тыя, хто парушае або абыходзіць санкцыі ЕС, будуць прыцягнутыя да адказнасці”. “Гэты акт прадугледжвае, — дадаў Латушка, — што дзяржавы Еўрасаюзу будуць кваліфікаваць пэўныя дзеянні як крымінальныя злачынствы”.
Да такіх дзеянняў, падкрэсліў намеснік кіраўніка АПК, плануецца прылічыць “дапамогу асобам, на якіх распаўсюджваюцца абмежавальныя меры ЕС, у абыходзе забароны на паездкі”; “гандаль таварамі, якія знаходзяцца пад санкцыямі, і вядзенне здзелак з дзяржавамі або арганізацыямі, на якія распаўсюджваюцца абмежавальныя меры Еўрасаюза”; “прадастаўленне фінансавых паслуг або ажыццяўленне фінансавай дзейнасці, якая забароненая або абмежаваная”; “утойванне валодання сродкамі або эканамічнымі рэсурсамі фізічнай, юрыдычнай асобай або органам, якія знаходзяцца пад санкцыямі ЕС”.
“Дапамаганне і падбухторванне да гэтых злачынстваў таксама будуць карацца як злачынства. Гандаль вайсковымі матэрыяламі будзе ўяўляць сабой крымінальнае злачынства, і калі здзейснены наўмысна, і калі меў месца ў выніку халатнасці”, — адзначыў Латушка.
Краіны ЕС, удакладніў ён, будуць абавязаныя “забяспечыць, каб парушэнне санкцый каралася эфектыўнымі, прапарцыйнымі і стрымліваючымі крымінальнымі пакараннямі, аж да турэмнага зняволення ад аднаго да пяці гадоў”, акрамя пазбаўлення волі, “парушальнікам абмежавальных захадаў могуць пагражаць штрафы”.
“Юрыдычным асобам, якія парушаюць абмежавальныя меры, прыйдзецца сутыкнуцца з санкцыямі, якія ўключаюць забарону на ажыццяўленне прадпрымальніцкай дзейнасці і адкліканне дазволаў на вядзенне эканамічнай дзейнасці”, — сказаў палітык.
Ён звярнуў увагу, што “гэтыя нормы будуць прынятыя ў форме дырэктывы”, якая прадугледжвае “далейшую абавязковую імплементацыю ў нацыянальныя прававыя сістэмы краін — членаў ЕС”.
“Усё гэта азначае, што дзяржавы Еўрасаюза актывізуюць свае намаганні для забеспячэння выканання ўведзеных санкцый і прыняцця мер па замарожванні і канфіскацыі даходаў, атрыманых у выніку парушэння санкцый”, — заявіў Латушка.
“Лукашэнка ўвесь час бравіруе сваім уменнем абыходзіць санкцыі. Ён залучаў у злачынныя схемы па парушэнні санкцыйных абмежаванняў не толькі падкантрольныя яму і яго рэжыму дзяржаўныя і прыватныя прадпрыемствы. Ён таксама прыцягвае да лабіявання яго інтарэсаў па абыходзе санкцый суб’екты гаспадарання, зарэгістраваныя ў краінах Еўрасаюза”, — адзначыў намеснік кіраўніка АПК.
Раней, падкрэсліў ён, “хлусня і хітрасць дыктатара бралі верх над прыстойнасцю і сумленнасцю, але, як гаворыцца ў народзе, колькі вяровачцы не віцца, а сутыкнуцца з рэальнасцю давядзецца”.
“Бізнесу, асабліва еўрапейскаму, вельмі важная рэпутацыя. А сляды, якія вядуць да Лукашэнкі, гэтую рэпутацыю руйнуюць. Ды і наўрад ці хтосьці захоча мець праблемы з законам і рэальна рызыкаваць сваёй свабодай і фінансамі дзеля ўтрымання дыктатара Лукашэнкі ва ўладзе”, — адзначыў Латушка.
НАУ і АПК, рэзюмаваў палітык, “пастаянна заклікаюць і абгрунтоўваюць неабходнасць узмацнення кантролю за выкананнем санкцыйных абмежаванняў” — “мы рады, што нашы партнёры чуюць голас беларускіх дэмакратычных сіл і робяць канкрэтныя дзеянні”.
Гл. таксама: