Кіраўнік МЗС Беларусі асудзіў умяшанне “самаабвешчаных дэмакратый” у справы іншых краін

19 студзеня, Позірк. Сельская гаспадарка Беларусі можа “ўнесці свой уклад у глабальныя намаганні па выкараненні голаду”, заявіў 19 студзеня на саміце Руху недалучэння (РН), які праходзіць у Кампале (Уганда) XIX, міністр замежных спраў Сяргей Алейнік

Паводле слоў кіраўніка дыпламатыі афіцыйнага Мінска, устойлівая тэндэнцыя да “дыскрымінацыі краін па палітычнай прыкмеце” і ўмяшанне “некаторых самаабвешчаных дэмакратый ва ўнутраныя справы іншых суверэнных дзяржаў” аказваюць негатыўны ўплыў на “шматбаковыя механізмы забеспячэння міжнароднага міру і бяспекі, правоў чалавека і развіцця”.

Алейнік заклікаў РН стаць цэнтрам па “рэагаванні на глабальныя выклікі”, каб адыграць вядучую ролю “ў працэсе зруху ў бок сапраўды шматпалярнага свету”. Пры гэтым кіраўнік МЗС падкрэсліў, што рух павінен быць здольны “знаходзіць кампрамісы паміж сваімі членамі і ўмацоўваць дыялог”, наводзіць масты з астатнім светам, “у тым ліку з калектыўным Захадам”.

Ён нагадаў, што Беларусь “адзін з найбуйнейшых вытворцаў калійных угнаенняў у свеце”, славіцца “IT-сферай і перадавымі тэхналогіямі ў прамысловасці”.

На міністэрскай сустрэчы Каардынацыйнага бюро РН у Азербайджане ў ліпені 2023 года Алейнік заявіў, што “санкцыйны ціск Захаду” негатыўна адбіваецца на ўстойлівым развіцці” арганізацыі.

“Ужо відавочна, што аднабаковыя прымусовыя меры накіраваны на недапушчэнне ўстойлівага развіцця “непажаданых” дзяржаў”, — цытуе дыпламата неафіцыйны тэлеграм-канал ведамства “Глас МИДа”.

Рух недалучэння — міжнародная арганізацыя, якая аб’ядноўвае 120 дзяржаў свету на прынцыпах няўдзелу ў ваенных блоках. Трэба адзначыць, што Беларусь, якая знаходзіцца ў РН, з’яўляецца членам рэгіянальнага ваенна-палітычнага блока — Арганізацыі Дагавора аб калектыўнай бяспецы.

У сувязі са шматлікімі фактамі парушэння правоў чалавека, а таксама падтрымкай афіцыйным Мінскам агрэсіўнай вайны Расіі супраць Украіны, у дачыненні да беларускага кіраўніцтва, асобных фізічных і юрыдычных асоб уведзены санкцыі ЕС (да якіх далучыліся Албанія, Боснія і Герцагавіна, Паўночная Македонія, Сербія, Чарнагорыя) і ЗША, а таксама Аўстраліі, Багамскіх астравоў, Вялікабрытаніі, Канады, Новай Зеландыі, Украіны, Тайваня, Швейцарыі, Паўднёвай Карэі, Японіі.

Абмежаванні ў тым ліку датычацца адчувальнага артыкула беларускага экспарту — калійных угнаенняў.