Саюзны медыяхолдынг “запрацуе ў поўным аб’ёме” да пачатку 2025 года — прадстаўнік беларускай амбасады ў РФ

31 студзеня, Позірк. Медыяхолдынг Саюзнай дзяржавы (СД) запрацуе ў поўным аб’ёме да пачатку 2025 года, паведаміў саветнік-пасланнік амбасады Беларусі ў Расіі Аляксандр Шпакоўскі.

“На сённяшні дзень трэба адшліфаваць юрыдычныя дэталі. Думаю, гэта зойме прыкладна паўгода. Далей кадравае пытанне, кадравае напаўненне”, — цытуе Шпакоўскага ТАСС.

Паводле яго слоў, з трох друкаваных выданняў Саюзнай дзяржавы застанецца адно: “Не думаю, што мэтазгодна захоўваць тры друкаваных выданні”.

Расійскі бок бачыць перспектывы холдынгу інакш. У медыяходынг СД увойдуць чатыры СМІ — дзве штотыднёвыя газеты, штотыднёвы часопіс і тэлеканал, “яны забяспечаць адзіную скаардынаваную інфармацыйную палітыку”, паведаміў 29 студзеня міністр лічбавага развіцця, сувязі і масавых камунікацый РФ Максут Шадаеў.

Зараз выходзіць штотыднёвая газета Парламенцкага сходу СД “Саюўнае веча”, якая распаўсюджваецца ў Беларусі ў якасці бясплатнага дадатку да “Народнай газеты”, у Расіі — у складзе “Камсамольскай праўды” накладам 318.625 экзэмпляраў.

Перыядычнае выданне Саўміна СД “Саюз. Беларусь — Расія” выходзіць штотыднёвым дадаткам да “Савецкай Беларусі” і “Расійскай газеты” са снежня 1999-га накладам 321.429 экзэмпляраў.

З 2006 года выдаецца штомесячны часопіс “Саюзная дзяржава” (наклад 15 тыс.).

З ідэяй стварэння медыяхолдынга Саюзнай дзяржавы Аляксандр Лукашэнка выступіў 4 лістапада 2021 года ў Маскве. Тады меркавалася, што структура з’явіцца да канца 2022 года.

9 студзеня 2023 года на сустрэчы з дзяржсакратаром СД Дзмітрыем Мезенцавым ён назваў новыя тэрміны: “Медыяхолдынг сёлета, пажадана ў першай палове года, павінен запрацаваць”.

30 сакавіка дэпутат Палаты прадстаўнікоў Нацыянальнага сходу Беларусі Генадзь Давыдзька на пасяджэнні ўзначаленай ім камісіі Парламенцкага сходу Беларусі і РФ па інфармацыйнай палітыцы, інфармацыйных тэхналогіях і сувязі выказаў незадаволенасць “нейкай празмернай засакрэчанасцю і кулуарнасцю” распрацоўкі канцэпцыі медыяхолдынга.

На пасяджэнні Вышэйшага дзяржаўнага савета СД 6 красавіка Лукашэнка чарговым разам заявіў аб неабходнасці стварэння “сур’ёзнага саюзнага медыяхолдынга”. “Мы не маем права прайграць бітву за розумы і сэрцы нашых грамадзян… Ідэалагічнае супрацьстаянне па лініі Захад — Усход не аслабее нават пасля таго, як замаўчаць гарматы. Гэта надоўга”, — сказаў ён.

Летась у ліпені Міністэрства лічбавага развіцця, сувязі і масавых камунікацый РФ паведаміла, што медыяхолдынг Саюзнай дзяржавы з’явіцца “не раней за 2024 год”.

31 кастрычніка 2023 года ў інтэрв’ю тэлеканалу “Беларусь 1” Мезенцаў паведаміў, што стварэнню медыяхолдынга перашкаджаюць “канцэптуальныя разыходжанні” паміж расійскім і беларускім бакамі. Рознагалоссі, паводле яго слоў, тычыліся бачання “сеткі вяшчання, масіва інфармацыі, якая надаецца”.