ДДБ Літвы: 60% беларусаў, якія ўяўляюць пагрозу нацбяспецы, працавалі ў МУС ці дзяржустановах

2 лютага, Позірк. Дэпартамент дзяржаўнай бяспекі (ДДБ) Літвы ў 2023 годзе праверыў 121.577 замежнікаў на прадмет пагроз, якія зыходзяць ад іх, у дачыненні да 1.415 складзеныя заключэнні аб непажаданасці іх пражывання ў краіне — пры гэтым 80% такіх асоб з’яўляюцца грамадзянамі Беларусі, — паведамляе выданне lrt.lt са спасылкай на інфармагенцтва BNS.

Адзначаецца, што заключэнні ДДБ прадставіў на разгляд у дэпартамент міграцыі пры МУС Літвы.

“Сярод беларусаў, пражыванне якіх у Літве ўяўляе пагрозу бяспецы, каля 60% працавалі ў сістэме ўнутраных спраў або дзяржаўных установах, каля 30% служылі ва Узброеных сілах, да 10% працавалі ў вайсковай прамысловасці або на іншых стратэгічных аб’ектах”, — заявілі ў ДДБ.

Падкрэсліваецца, што “высновы пра пагрозу, якую прадстаўляюць замежныя грамадзяне для бяспекі дзяржавы, робяцца з улікам наяўнай разведвальнай інфармацыі і іншых звестак”.

“Дэпартамент дзяржаўнай бяспекі не каментуе асобныя выпадкі, але адзначае, што неаднаразова папярэджваў пра рызыкі і пагрозы, звязаныя з рэзкім павелічэннем плыні эмігрантаў з Беларусі”, — паведаміў Дэпартамент дзяржбяспекі.

Паводле звестак ДДБ, большасць беларусаў, якія пражываюць у Літве, з’яўляюцца “эканамічнымі мігрантамі”, і “толькі частка з іх удзельнічае ў розных апазіцыйных мерапрыемствах”. “Гэта адкрывае перад беларускімі спецслужбамі магчымасці для пашырэння сваёй дзейнасці і выкарыстання лаяльных рэжыму асоб супраць інтарэсаў Літвы”, — гаворыцца ў паведамленні ведамства.

Літоўская спецслужба зрабіла заяву на фоне пазбаўлення ВНЖ экс-супрацоўніка беларускага МУС Аляксандра Маціевіча, які ў 2020 годзе ўдзельнічаў у рэпрэсіях, а затым атрымаў права на пражыванне ў Літве, дзе працаваў усталёўшчыкам вокнаў.

Даведацца пра яго мінулае літоўскім уладам дапамаглі прадстаўнікі беларускай дыяспары і супрацоўнікі аб’яднання былых сілавікоў BelPol.

У сувязі з гэтым, паведаміў партал lrt.lt, Службе аховы дзяржаўнай мяжы (САДМ) Літвы даручана “неадкладна ўзмацніць праверкі беларускіх грамадзян, якія перасякаюць дзяржаўную мяжу”, а дэпартамент міграцыі пры МУС будзе “больш старанна правяраць грамадзян Беларусі, якія атрымалі або хадайнічаюць аб атрыманні ВНЖ у Літоўскай Рэспубліцы на падставе працаўладкавання”.

26 лістапада 2023 года начальнік ДДБ Літвы Дарус Яўнішкіс заявіў аб беспрэцэдэнтна высокім узроўні актыўнасці КДБ Беларусі, адзначыўшы, што некаторыя прадстаўнікі шматлікай беларускай дыяспары выклікаюць у спецслужбаў Літвы “пэўныя пытанні”.

22 лістапада дэпартамент міграцыі пры МУС Літвы заяўляў, што за год (з лістапада 2022-га) пасля ўвядзення спецыяльнай анкеты, якая абавязковая для запаўнення грамадзянамі РФ і Беларусі, чый прававы статус правяраецца міграцыйнай службай, прыняў 1.644 пастановы аб пагрозе дзяржаўнай бяспецы з боку грамадзян Беларусі.

Тады сцвярджалася, што ў выдачы дазволу на часовае пражыванне ў Літве беларусам было адмоўлена 562 разы, у замене гэтага дакумента — 343. Паведамлялася аб 450 прынятых рашэннях аб ануляванні раней наяўных у беларускіх грамадзян дазволаў на часовае пражыванне, якія заставаліся сапраўднымі, дзвюх адмовах ім у выдачы пастаяннага віду на жыхарства ў Літве, 8 рашэннях аб ануляванні такіх дакументаў, 279 адмоўных адказах грамадзянам Беларусі пры звароце за нацыянальнай літоўскай візай.

Гл. таксама:

BelPol паведаміў пра вяртанне з Літвы ў Беларусь былога міліцыянера, якога абвінавачваў у рэпрэсіях

Былы супрацоўнік МУС Беларусі Маціевіч пазбаўлены ВНЖ у Літве

Міністр абароны Літвы назваў “вельмі прыкрым” выдачу ВНЖ экс-супрацоўніку МУС Беларусі Маціевічу