Кавалеўскі: Пакуль суседзі працягваюць гандляваць з агрэсарамі, беларусы мусяць мець права падарожнічаць

9 лютага, Позірк. “Пакуль нашыя суседзі працягваюць гандляваць з агрэсарамі, беларусы мусяць мець права падарожнічаць”, — адзначыў намеснік кіраўніцы Аб’яднанага пераходнага кабінета (АПК), прадстаўнік па замежных справах Валер Кавалеўскі на сваёй старонцы ў сацсетцы Х.

“Жалезная заслона, якую ўмацоўваюць асобныя еўрапейскія дзяржавы, не замінае далейшаму гандлю з ворагамі Украіны і ўсёй Еўропы. Тады і мабільнасці беларусаў — адзінаму спосабу вырвацца з канцлагера, у які Лукашэнка пераўтварае Беларусь, замінаць не мусіць”, — падкрэсліў палітык.

Паводле яго слоў, “жалезная заслона на заходніх межах Беларусі супярэчыць імкненню” Еўрасаюза бачыць Беларусь “часткай мірнай Еўропы”. Выбары “прыходзяць і сыходзяць”, а Беларусь, падкрэсліў намеснік кіраўніцы АПК, “заўсёды будзе часткай еўрапейскай сям’і”.

8 лютага дэмакратычны лідар Святлана Ціханоўская праз літоўскую прэсу заклікала “не будаваць жалезную заслону на мяжы”, бо закрыццё памежных пераходаў нашкодзіць у першую чаргу беларускаму народу. “Ад ізаляцыі беларусаў выйграюць Лукашэнка і Пуцін. Для вялікай колькасці беларусаў мяжа з Літвой — адзіная сувязь са свабодным светам”, — падкрэсліла яна.

У той жа дзень прэзідэнт Літвы Гітанас Наўседа заявіў медыя, што “жалезная заслона” паміж Усходам і Захадам “ужо апусцілася” пасля 24 лютага 2022 года, калі РФ пачала поўнамаштабную вайну супраць Украіны, а афіцыйны Мінск у гэтай сітуацыі падтрымаў Маскву.

Прэзідэнцкія выбары ў Літве пройдуць 12 траўня 2024 года, членаў Еўрапарламента — 9 чэрвеня, літоўскага Сейма — 13 кастрычніка. З набліжэннем выбараў асобныя палітычныя сілы Літвы пачалі заяўляць, што беларусы нібыта ствараюць пагрозу нацыянальнай бяспецы краіны.