Беларусь і Зімбабвэ зацвердзілі план сумесных мерапрыемстваў у ваеннай сферы

21 лютага, Позірк. План сумесных мерапрыемстваў у ваеннай сферы падпісаны Міністэрствамі абароны Беларусі і Зімбабвэ 20 лютага ў Харарэ.

Прэс-служба беларускага ваеннага ведамства адзначае, што цырымонія падпісання дакумента прайшла з удзелам пасла Беларусі ў гэтай афрыканскай краіне Ігара Маршалава і пасла Зімбабвэ ў Беларусі Ігнаціуса Грэма Мудзімбы.

31 студзеня 2023 года падчас наведвання Зімбабвэ Аляксандрам Лукашэнкам было падпісанае пагадненне аб стварэнні сумеснай камісіі па супрацоўніцтве паміж краінамі. 2 траўня ён зацвердзіў дакумент.

26 студзеня гэтага года міністр унутраных спраў Іван Кубракоў падпісаў у Зімбабвэ мемарандум аб супрацоўніцтве паміж праваахоўнымі ведамствамі дзвюх дзяржаў. Паводле слоў кіраўніка МУС, Лукашэнка “даручыў аказаць усялякую падтрымку зімбабвійскім сябрам”.

31 студзеня мемарандум аб супрацоўніцтве падпісалі ў Мінску міністр прамысловасці Аляксандр Рагожнік і яго зімбабвійская калега Сітэмбіса Джайл Глэдзіс Ньёні.

Беларускія ўлады актывізавалі кантакты з Зімбабвэ ў 2023 годзе, аднак актуальных звестак па двухбаковым тавараабароце пакуль няма. Па выніках 2022 года аб’ём узаемнага гандлю склаў каля 40 млн долараў, 2021-га — 25 млн, 2020-га — 33,6 млн.

Лукашэнка наведваў Зімбабвэ з 30 студзеня да 1 лютага 2023 года. У красавіку са шматдзённым візітам у Мінск прыязджала жонка прэзідэнта гэтай краіны Аксілія Мнангагва.