Завяршаецца падрыхтоўка да экспедыцыі на МКС, у якой удзельнічае беларуска Васілеўская

9 сакавіка, Позірк. Падрыхтоўка да экспедыцыйнага наведвання Міжнароднай касмічнай станцыі (МКС), у якім удзельнічае беларуска Марына Васілеўская, выйшла на завяршальны этап, вынікае з інфармацыі на сайце Цэнтра падрыхтоўкі касманаўтаў імя Юрыя Гагарына.

Адзначаецца, што 7 сакавіка на касмадроме Байканур (Казахстан) удзельнікі экспедыцыі правялі так званую “прымерку” пілатуемага карабля “Саюз МС-25” — пагрузіліся ў яго, “азнаёміліся з месцамі размяшчэння грузаў у бытавым адсеку і касмічнай капсуле”, выканалі “працу з абсталяваннем”, а таксама “іншыя прадугледжаныя планам трэніроўкі дзеянні”.

У асноўны склад уваходзяць камандзір экіпажа, касманаўт “Раскосмасу” Алег Навіцкі (РФ, ураджэнец Беларусі), бортправадніца авіякампаніі “Белавія” Марына Васілеўская (Беларусь) і астранаўт НАСА Трэйсі Колдуэл-Дайсан (ЗША). Іх дублёры — Іван Вагнер (РФ), Анастасія Лянкова (Беларусь) і Дональд Петыт (ЗША).

Першапачаткова палёт з удзелам беларускі быў запланаваны на сакавік 2023 года. Пасля было заяўлена, што праз узніклую няштатную сітуацыю ён перанесены на восень. Пазней тэрмін перанеслі яшчэ на паўгода — старт карабля намецілі на люты, а затым на 13 сакавіка 2024 года.

Цяпер запланавана, што карабель “Саюз МС-25” стартуе на арбіту 21 сакавіка. Беларуская ўдзельніца экспедыцыі правядзе на МКС 12 дзён.