Дарадца Ціханоўскай назваў законапраект аб ІП “чарговым цвіком у труну дробнага бізнесу”

3 красавіка, Позірк. Законапраектам “Аб змене законаў па пытаннях прадпрымальніцкай дзейнасці” ўлады паслядоўна ўскладняюць жыццё прадпрымальнікам, гэты дакумент — “чарговы цвік у труну дробнага бізнесу”, адзначыў дарадца Святланы Ціханоўскай па эканамічных рэформах Алесь Аляхновіч.

Як адзначае прэс-служба Ціханоўскай, калі дакумент ухваліць Савет Рэспублікі і падпіша Аляксандр Лукашэнка, то шматлікім індывідуальным прадпрымальнікам давядзецца перарэгістравацца ці спыніць працу. 

“Новыя правілы істотна абмяжуюць спіс відаў дзейнасці, па якіх можна зарабляць індывідуальным прадпрымальнікам. Тым, хто не ўвойдзе ў гэты пералік, давядзецца перарэгістравацца ў юрыдычныя асобы да 31 снежня 2025 года або спыніць дзейнасць з 1 кастрычніка 2024-га”, — удакладніў Аляхновіч.

“Індывідуальнае прадпрымальніцтва — самы просты спосаб пачатку камерцыйнай дзейнасці. Ён не патрабуе выдаткаў на офіс, бухгалтара або іншых супрацоўнікаў. Калі ў чалавека атрымліваецца развіць бізнес у форме ІП, з часам ён можа перарэгістравацца ў юрыдычную асобу, што мае свае плюсы для бізнесу большых памераў. Для параўнання, у Польшчы 2,5 млн чалавек вядуць дзейнасць у форме ІП. Гэта ў 2,5 разы болей у пераліку на колькасць насельніцтва, чым у Беларусі”, — адзначыў дарадца Ціханоўскай.

Ён падкрэсліў, што “замест стварэння стымулаў для развіцця бізнесу, улады зноў вырашылі выкарыстоўваць забарону”.

Законапраект “Аб змяненні законаў па пытаннях прадпрымальніцкай дзейнасці” прыняты Палатай прадстаўнікоў у другім чытанні 21 сакавіка. Ён сярод іншага абмяжоўвае віды дзейнасці, якія змогуць ажыццяўляць індывідуальныя прадпрымальнікі. Іх пералік будзе ўстанаўлівацца ўрадам асобна.

Раней паведамлялася: у пераліку не будзе гуртавога гандлю, турыстычных і юрыдычных паслугаў, арганізацыі і правядзення культурніцкіх і забаўляльных мерапрыемстваў, некаторых паслугаў у галіне ІТ.

Паводле падлікаў Мінэканомікі, пасля перагляду відаў дзейнасці колькасць індывідуальных прадпрымальнікаў можа скараціцца амаль удвая — з 263 тыс. да 143,5 тысяч, колькасць нанятых у іх працаўнікоў — з 64,6 тыс. да 47,1 тыс.

Задачу мадэрнізаваць фармат працы малога бізнесу паставіў Аляксандр Лукашэнка ў чэрвені мінулага года.

У 2022 годзе ён адзначыў, што “айцішнікі і іпэшнікі былі ў авангардзе барацьбы ў 2020 годзе”, “вываліліся на вуліцы”.

У Мінскім сталічным саюзе прадпрымальнікаў і працадаўцаў прыняцце законапраекта па пытаннях прадпрымальніцтва ў другім чытанні “успрынялі са шкадаваннем”, заявіў  дырэктар арганізацыі Віктар Маргелаў.

“Для развіцця прадпрымальніцтва ў краіне, на наш погляд, трэба не адміністратыўныя меры выкарыстоўваць, а ствараць эканамічныя стымулы. Гэта дазволіць пераразмеркаваць наяўныя кадравыя рэсурсы з карысцю для грамадства і эканомікі”, — падкрэсліў Маргелаў.

Намеснік старшыні Беларускага саюза прадпрымальнікаў Кацярына Гамзунова адзначыла, што “прывабнасць інстытута індывідуальнага прадпрымальніцтва за апошнія гады істотна знізілася”.

Дырэктар бізнес-саюза “Канструктыўны дыялог” Жанна Рогава заявіла, што арганізацыя не бачыць “вялікага сэнсу ў такой рэформе прадпрымальніцтва”, бо цяпер, наадварот, “неабходна ствараць усялякія ўмовы, каб фізічныя асобы, у тым ліку ІП, маглі знайсці працу, асабліва ў рэгіёнах”.