Беларускія зняволеныя гатовыя шыць форму для паліцэйскіх Манголіі — Кубракоў
Паліцыя Манголіі (ілюстрацыйнае фота)
2 чэрвеня, Позірк. Падчас сустрэчы з намеснікам міністра юстыцыі і ўнутраных спраў Манголіі Баярсайхан Салонгаа кіраўнік МУС Іван Кубракоў падкрэсліў “патэнцыял для развіцця ўзаемадзеяння ў розных сферах, у тым ліку ў вырашэнні задач па падтрыманні міру, бяспекі і правапарадку”, паведамляе прэс-служба беларускага ведамства.
“Падзеі, якія адбываюцца ў свеце, пацвярджаюць, што асаблівую ўвагу неабходна надаваць супрацьдзеянню ўсіх відаў і формаў злачыннасці, супрацоўніцтву ў праваахоўных пытаннях паміж краінамі. Паспяхова супрацьстаяць сучасным выклікам і пагрозам магчыма толькі разам”, — сказаў Кубракоў.
МУС Беларусі, паводле яго слоў, зацікаўленае ў развіцці супрацоўніцтва з мангольскім праваахоўным ведамствам па шэрагу напрамкаў: забеспячэнне бяспекі дарожнага руху, паляпшэнне прававога становішча грамадзян дзвюх краін, устанаўленне практычных кантактаў і абмен перадавым вопытам, у тым ліку ў галіне навучання спецыялістаў.
Адзначаецца, што Кубракоў таксама звярнуў увагу на “перспектыўнасць узаемадзеяння ў маштабах міжнародных арганізацый, такіх як Нарада міністраў унутраных спраў і грамадскай бяспекі дзяржаў — членаў ШАС”. У рамках гэтай арганізацыі, як сцвярджаецца, прымаюцца “эфектыўныя меры па супрацьдзеянні транснацыянальнай злачыннасці і ўмацаванню калектыўнай бяспекі”.
“Мы маем адпрацаваную сістэму падрыхтоўкі замежных праваахоўнікаў і гатовыя аказаць усямернае садзейнічанне ў навучанні мангольскіх паліцэйскіх. Гэта можа быць арганізацыя кароткатэрміновых курсаў на базе Акадэміі МУС, павышэнне кваліфікацыі ў міжнародным навучальным цэнтры сталічнай міліцэйскай ВНУ”, — дадаў кіраўнік ведамства.
Акрамя таго, як паведамляецца, прадпрыемствы Дэпартамента выканання пакаранняў МУС “гатовыя вырабіць для праваахоўнікаў Манголіі форменнае адзенне, абутак, спецыяльную экіпіроўку”.
“МУС Беларусі адкрытае для ўзаемадзеяння па шырокім спектры пытанняў”, — заявіў Кубракоў.
Міністр унутраных спраў знаходзіцца ў Манголіі ў рамках дзяржаўнага візіту ў гэтую краіну Аляксандра Лукашэнкі. Візіт праходзіць 1–4 чэрвеня.
Былыя палітвязні, у асноўным жанчыны, пасля вызвалення неаднаразова паведамлялі, што ў беларускіх папраўчых установах наладжаная вытворчасць форменнага адзення для сілавых ведамстваў Беларусі.