Савет бяспекі бачыць падставы разабрацца з транзітнай забаронай Літвы “сілай зброі”, але “не ў цяперашніх умовах”
28 кастрычніка, Позірк. “Літва фактычна забараніла нам перамяшчаць свае тавары праз мяжу. Паводле ўсіх норм міжнароднага права такі крок адносіцца да эканамічнай агрэсіі”, — заявіў першы намеснік дзяржсакратара Савета бяспекі Беларусі Павел Муравейка на арганізаваным Мінгарвыканкамам ідэалагічным семінары.
Вытрымкі выступу чыноўніка апублікаваныя ў спецыяльным выпуску выдання “Вячэрні Мінск” за 24 кастрычніка.
“З пункту гледжання банальнай логікі мы маем усе падставы, каб прасекчы жыццёва важны для нас калідор сілай зброі. І ў іншых бы ўмовах нас бы ніхто ў свеце не асудзіў, адважуся меркаваць. Але не ў цяперашніх, калі на краіну чыніцца беспрэцэдэнтны ціск з боку Захаду”, — сказаў ён.
Сярод іншага Муравейка згадаў чэрвеньскую рэзалюцыю Міжнароднай арганізацыі працы (МАП). Яна рэкамендуе краінам — членам МАП перагледзець стасункі з Беларуссю праз невыкананне Мінскам абавязацельстваў паводле канвенцый 87 і 98 — аб свабодзе асацыяцыі і аб праве на арганізацыю і на вядзенне калектыўных перагавораў адпаведна. На думку чыноўніка, прыняццем гэтага дакумента арганізацыя “блакавала развіццё эканомікі” Беларусі, “парушыўшы прынцып мірнага суіснавання”.
Санкцыі краін Захаду “і іх саюзнікаў” у дачыненні да Беларусі прадстаўнік Савета бяспекі назваў праявай “звычайнай нядобрасумленнай канкурэнцыі”, захопам “заваяванага месца на сусветных рынках” і жаданнем даць “прэферэнцыі сваім вытворцам”.
Беларуская эканоміка, сцвярджае ён, “даказала сваю ўстойлівасць” у гэтых умовах. Разам з тым Муравейка прызнаў, што “санкцыйная палітыка зрабіла негатыўны ўплыў на функцыянаванне пэўных фінансавых сістэм”, напрыклад, абцяжарыла “правядзенне транзакцый у доларах ЗША і еўра”.
На пачатку 2022 года Літоўская чыгунка на рашэнне ўрада краіны скасавала дамову з “Беларуськаліем”, які трапіў пад санкцыі, на транзіт мінеральных угнаенняў, паколькі Вільнюс палічыў яе не адпаведнай нацыянальным інтарэсам.
У чэрвені таго ж года Літва праз санкцыі ЕС забараніла транзіт большасці тавараў у Калінінградскую вобласць Расіі, які ішоў з асноўнай часткі РФ праз Беларусь.