Былы намеснік міністра энергетыкі Міхадзюк знаходзіцца ў СІЗА па крымінальнай справе (дапоўнена)

14 чэрвеня, Позірк. Былы намеснік міністра энергетыкі Міхаіл Міхадзюк знаходзіцца ў следчым ізалятары, пра гэта стала вядома 14 чэрвеня на нарадзе Аляксандра Лукашэнкі з кіраўніцтвам Савета міністраў.

Паводле інфармацыі дзяржаўных СМІ, сёлета 26 студзеня Следчы камітэт узбудзіў у дачыненні да экс-чыноўніка крымінальную справу “за спрыяльнае вырашэнне пытанняў па выбары замежнай кампаніі ў якасці падрадчыка для будаўніцтва і мадэрнізацыі высакавольтных падстанцый у Беларусі”.

“Гэта значыць на табе падстанцыю, ідзі і мадэрнізуй, але ты мне дай хабар. Дзясяткі тысяч долараў! Чалавек усё жыццё адпрацаваў у міністэрстве… Дзе ён зараз?” — спытаў на нарадзе Лукашэнка.

“Ён там. <…> У СІЗА”, — адказаў намеснік прэм’ер-міністра Пётр Пархомчык.

Паводле слоў Лукашэнкі, у рамках крымінальных спраў за хабар прыцягнута 30 чалавек. Ён згадаў справу свайго былога памочніка — інспектара па Віцебскай вобласці, экс-міністра сельскай гаспадаркі і харчавання Ігара Брыло; першага намесніка кіраўніка справамі прэзідэнта Дзмітрыя Рыбко (ахарактарызаваў такім чынам: “Хабарнік — кляйма ставіць няма дзе”).

“Абралі гэты шлях — ідзіце па ім. Больш я вас угаворваць і прасіць не буду. Крок налева, крок направа — да сценкі паставім! Публічна вам заяўляю, — папярэдзіў Лукашэнка чыноўнікаў. — Як пытанні нейкія вырашыць — ну проста бяда: сам вызначаеш пытанні, сам ставіш заданні, сам едзеш і правяраеш, потым робіш замест вас”.

“Апошняя размова з вамі. Якая б электаральная кампанія ні была. Я вам ужо неяк казаў. Я тут асабліва не паруся наконт таго, падтрымаеце вы мяне ці не. Я дамоўлюся з беларускім народам. Я знайду з ім агульную мову. Я тры дзясяткі гадоў знаходжу з ім агульную мову. А вось вы падумайце, з кім вы будзеце працаваць”, — дадаў ён.

Паводле даных Генпракуратуры, у 2023 годзе колькасць “улічаных карупцыйных злачынстваў” павялічылася ў Беларусі на 16,4% — з 1.076 да 1.253. Пры гэтым на 12,8% вырасла колькасць асоб, якія іх здзейснілі.

28 снежня 2023 года ўрад вызваліў 68-гадовага Міхадзюка, які курыраваў будаўніцтва Беларускай АЭС, ад пасады намесніка міністра энергетыкі “ў сувязі з выхадам у адстаўку”.