Праваабаронца Судаленка завочна асуджаны на пяць гадоў пазбаўлення волі

17 чэрвеня, Позірк. Да пяці гадоў пазбаўлення волі ва ўмовах строгага рэжыму прыгавораны завочна Гомельскім абласным судом вядомы беларускі праваабаронца, былы палітвязень Леанід Судаленка, паведамляе “Гомельская Вясна”.

У адпаведнасці з рашэннем суда ад 17 чэрвеня Судаленка таксама павінен выплаціць штраф у памеры 650 базавых велічынь (26.000 рублёў).

Праваабаронца абвінавачваўся паводле ч. 1 і 2 арт. 361⁴ Крымінальнага кодэкса (садзейнічанне экстрэмісцкай дзейнасці).

Аб заканчэнні следства па справе Судаленка напісаў у “Фэйсбуку” 8 красавіка.

“Следчы камітэт паведаміў сёння аб заканчэнні расследавання новага абвінавачвання мяне ў “іншым садзейнічанні экстрэмісцкай дзейнасці”, прычым абвінавачваючы ў паўторнасці (да 7 гадоў турмы). Паведамляецца аб перадачы справы пракурору для накіравання ў суд”, — адзначыў ён.

Судаленка дадаў, што “са свайго боку” паведамляе Следчаму камітэту пра “перадачу фактаў палітычных рэпрэсій у створаную пры Савеце ААН па правах чалавека групу міжнародных экспэртаў, якія займаюцца расследаваннямі рэпрэсій у Беларусі”.

Пра пачатак спецвытворчасці Следчы камітэт паведаміў 4 сакавіка.

У рамках першай крымінальнай справы праваабаронца быў затрыманы 18 студзеня 2021 года, абвінавачаны ў “арганізацыі і падрыхтоўцы дзеянняў, якія груба парушаюць грамадскі парадак”, “падрыхтоўцы асоб для ўдзелу ў такіх дзеяннях, а таксама іх фінансаванні або іншым матэрыяльным забеспячэнні” (ч. 1 і 2 арт. 342 КК).

3 лістапада 2021 года суд Цэнтральнага раёна Гомеля (суддзя Сяргей Салоўскі) прыгаварыў праваабаронцу да трох гадоў зняволення ва ўмовах агульнага рэжыму. Ён вызваліўся пасля адбыцця пакарання ў ліпені 2023 года і пакінуў краіну.

17 студзеня 2024 года Камітэт па правах чалавека (КПЧ) ААН даслаў Судаленку рашэнне з нагоды скаргі аб сістэматычных парушэннях недатыкальнасці яго прыватнага жыцця, гарантаванага арт. 17 Міжнароднага пакта аб грамадзянскіх і палітычных правах.

Судаленка звяртаўся ў КПЧ з нагоды паглыбленых надглядаў на мяжы і існавання “палітычнага спісу” ў памежнікаў у 2015 годзе. Мяркуючы па нумары (№2929/2017), скарга была прынятая ў 2017 годзе.

КПЧ прыйшоў да высновы, што кожны чалавек павінен мець права ведаць якія персанальныя даныя і дзеля якіх мэт захоўваюцца ў аўтаматычных базах дзяржаўных органаў. Таксама кожны павінен мець магчымасць высветліць, якія дзяржорганы кантралююць або могуць кантраляваць персанальныя дадзеныя і іх адпаведнасць рэчаіснасці.

Згодна з прынятым рашэннем, беларускі ўрад павінен забяспечыць пацярпеламу эфэктыўную прававую абарону, у тым ліку поўнае пакрыццё шкоды і любых выдаткаў, якія ён меў. Беларусь абавязаная таксама прыняць меры для папярэджання аналагічных парушэнняў у будучыні.