Вайскоўцы Беларусі і Кітая абмеркавалі супрацоўніцтва ў галіне тылавога забеспячэння
12 ліпеня,Позірк. Пытанні двухбаковага супрацоўніцтва ў галіне тылавога забеспячэння Узброеных сіл абмеркавалі на сустрэчы ў Мінску 12 ліпеня прадстаўнікі абаронных ведамстваў Беларусі і Кітая.
Дэлегацыя Аб’яднаных сіл матэрыяльна-тэхнічнага забеспячэння Народна-вызваленчай арміі Кітая знаходзіцца з візітам у Беларусі 11–13 ліпеня, паведамляе прэс-служба Мінабароны Беларусі.
Беларуска-кітайскае ваеннае супрацоўніцтва актывізавалася гэтым летам.
6 ліпеня паведамлялася аб прыбыцці Беларусь кітайскіх вайскоўцаў для ўдзелу ў сумеснай трэніроўцы з падраздзяленнямі Узброеных сіл Беларусі. Манёўры праходзяць 8–19 ліпеня пад Брэстам паблізу мяжы з Польшчай у рамках “гадавога плана і кітайска-беларускіх дамоўленасцяў”.
Мінабароны Беларусі сцвярджае, што трэніроўка дазволіць бакам “абмяняцца вопытам, правесці зладжванне беларускіх і кітайскіх падраздзяленняў, стварыць падмурак для далейшага развіцця беларуска-кітайскіх адносін у сферы сумеснай падрыхтоўкі войскаў”.
Афіцыйны прадстаўнік Міністэрства замежных спраў КНР Лін Цзянь 11 ліпеня заявіў, што сумесныя кітайска-беларускія ваенныя манёўры не накіраваныя супраць якой бы там ні было трэцяй краіны. Паводле яго слоў, супрацоўніцтва паміж Кітаем і Беларуссю, у тым ліку ў сферы бяспекі, “не павінна быць накіраванае супраць інтарэсаў трэцяга боку і не павінна падрываць рэгіянальны мір і стабільнасць”.
6–8 ліпеня ў Мінску знаходзілася дэлегацыя Цэнтральнага ваеннага савета Кітая, якая абмяркоўвала ў беларускім абаронным ведамстве пытанні арганізацыі навучальнага працэсу пры падрыхтоўцы кадраў.
Кітайскія вайскоўцы прынялі ўдзел у парадзе, які прайшоў у Мінску 3 ліпеня, прысвечаным 80-й гадавіне вызвалення Беларусі ад нямецка-фашысцкіх захопнікаў.
11–13 чэрвеня ў Кітаі знаходзілася дэлегацыя беларускага Мінабароны на чале з камандуючым Ваенна-паветраных сіл і войскаў супрацьпаветранай абароны генерал-маёрам Андрэем Лук’яновічам. Яна наведала прадпрыемствы ваенна-прамысловага комплексу Кітая і азнаёмілася з аб’ектамі ваеннай інфраструктуры КНР.
Аляксандр Лукашэнка на сустрэчы з тагачасным міністрам абароны КНР Лі Шанфу 17 жніўня 2023 года заявіў, што ваеннае супрацоўніцтва дзвюх краін “ні ў якім разе не будзе накіраванае супраць трэціх краін”. “Нам гэта не трэба, нам трэба засцерагчы свае дзяржавы і свае народы”, — сказаў ён.