Батутыстка Бардзілоўская заваявала першы медаль Беларусі на Алімпіядзе ў Парыжы
2 жніўня, Позірк. 19-галовая Віялета Бардзілоўская заняла другое месца ў фінале жаночага алімпійскага турніру па скачках на батуце. Гэта першы медаль беларускіх спартсменаў на XXXIII летніх Алімпійскіх гульнях у Парыжы.
Бардзілоўская набрала 56,060 бала, прапусціўшы наперад Брыёні Пэйдж з Вялікабрытаніі (56,480). Бронзавая ўзнагарода ў канадкі Сафіям Мето (55,650).
АГ-2024 пачаліся 26 ліпеня і працягнуцца да 11 жніўня. У медальным заліку першыя пяць месцаў займаюць Кітай (12 залатых, 7 срэбраных, 7 бронзавых), ЗША (9, 16, 14), Францыя (8, 11, 9), Вялікабрытанія (8, 8, 8) і Аўстралія (8, 6, 5). Беларусь не ўлічваецца, але дэ-факта дзяліла б у заліку 41-е месца з Манголіяй, Тунісам і Фіджы.
Беларускія спартоўцы на Алімпіядзе выступаюць пад нейтральным сцягам. Усе яны, як і дапушчаныя да ўдзелу ў Алімпіядзе спартсмены з Расіі, былі адобраныя нейтральнай групай па праверцы адпаведнасці спартсменаў кваліфікацыйным патрабаванням (AINERP), якую Міжнародны алімпійскі камітэт (МАК) заснаваў сёлета ў сакавіку.
Пасля гэтага Нацыянальны алімпійскі камітэт Беларусі зацвердзіў “спісачным складам” у якасці індывідуальных нейтральных спартсменаў 17 чалавек для ўдзеду ў АГ-2024.
28 лютага 2022 года, праз некалькі дзён пасля пачатку вайны ва Украіне, МАК заклікаў спартыўныя федэрацыі не дапускаць да спаборніцтваў пад сваёй эгідай атлетаў з РФ і Беларусі. Гэтая рэкамендацыя была неадкладна і масава прынятая да выканання, у выніку чаго расійскі і беларускі спорт апынуўся амаль у поўнай ізаляцыі.
25 студзеня 2023 года выканкам МАК пацвердзіў санкцыі, уведзеныя ў дачыненні да Беларусі і РФ праз вайну супраць Украіны, аднак адзначыў, што ніводнаму спартоўцу нельга забараняць удзельнічаць у спаборніцтвах “толькі праз ягоны пашпарт”.
28 сакавіка таго ж года МАК выпусціў заяву, у якой рэкамендаваў міжнародным федэрацыям у тыпах спорту дазволіць беларусам і расіянам удзельнічаць у міжнародных спаборніцтвах. Пры гэтым павінен быць выкананы шэраг умоў. Беларускія і расійскія атлеты могуць спаборнічаць “у якасці індывідуальных нейтральных спартсменаў” (без выкарыстання сцяга, гімна і іншай сімволікі сваіх дзяржаў) і толькі ў тым выпадку, калі яны” актыўна не займаліся падтрымкай баявых дзеянняў” і не маюць дзейных кантрактаў з сілавымі і ваеннымі ведамствамі сваіх краін.
У Беларусі Алімпіяду афіцыйна не транслююць: у студзені 2023 МАК пазбавіў гэтага права Белтэлерадыёкампанію да 2032 года. Аднак ужо быў прэцэдэнт пірацкага эфіру, калі адна з беларускіх спартсменак удзельнічала ў фінальных спаборніцтвах. Пасля ўвядзення заходніх санкцый беларускія ўлады ўзаконілі пірацтва ў розных сферах.