Вялікабрытанія ўвяла санкцыі ў дачыненні да беларускіх прадпрыемстваў і начальнікаў калоній
9 жніўня, Позірк. Тры дзейныя і адзін былы начальнік беларускіх папраўчых установаў, а таксама тры прадпрыемствы сталі аб’ектамі новых санкцый Вялікабрытаніі, прымеркаваных да чацвёртай гадавіны “фальшывых выбараў” прэзідэнта.
У санкцыйны спіс Лондана трапілі былы начальнік наваполацкай ВК № 1 Андрэй Пальчык, начальнікі віцебскай ВК № 3 Філіп Стурчанка, гомельскай ВК № 4 Дзяніс Талсцянкоў і магілёўскай ВК № 15 Аляксей Лазарэнка.
Як лічыць брытанскі ўрад, гэтыя асобы “нясуць адказнасць за здзяйсненне, а таксама ўдзел, падтрымку і садзейнічанне здзяйснення сур’ёзных парушэнняў правоў чалавека, прыгнечанне грамадзянскай супольнасці і дэмакратычнай апазіцыі, а таксама дзеянні і дзейнасць, якія падрываюць дэмакратыю і вяршэнства права ў Беларусі”.
ААТ “Станкагомель” і мінскае ТАА “Рухсерваматор” трапілі пад санкцыі за пастаўкі тавараў для патрэб ваенна-прамысловага комплексу Расіі, ААТ “НДЭВМ” — як “афіляваная з урадам Беларусі арганізацыя, якая ажыццяўляе дзейнасць у абаронным комплексе Беларусі”.
Разам з санкцыямі Вялікабрытанія аб’явіла аб запланаваным фінансаванні ў памеры 2,5 млн фунтаў стэрлінгаў (амаль 3,2 млн долараў па бягучым курсе) у гэтым фінансавым годзе беларускіх праваабарончых арганізацый і грамадзянскай супольнасці, уключаючы далейшае фінансаванне Міжнароднай платформы па прыцягненню да адказнасці для Беларусі, кааліцыі, якая займаецца зборам, праверкай і захаваннем доказаў грубых парушэнняў правоў чалавека, якія з’яўляюцца злачынствамі з пункту гледжання міжнароднага права, як мяркуецца, учыненых беларускімі ўладамі.
Лондан адзначае, што “са жніўня 2020 года беларускія ўлады зрабілі больш за 40.000 палітычна матываваных арыштаў і распачалі не менш за 12.000 палітычна матываваных крымінальных спраў”. “Па дадзеных беларускай няўрадавай арганізацыі “Праваабарончы цэнтр “Вясна”, у Беларусі застаюцца ў зняволенні 1.389 палітвязняў, уключаючы праваабаронцаў, журналістаў, прадстаўнікоў дэмакратычнай апазіцыі і прафсаюзных актывістаў”, — гаворыцца ў паведамленні брытанскага ўрада.
Яно таксама нагадвае, што з 2021 года ў зняволенні памерла сама меней шэсць палітвязняў, многія іншыя ўтрымліваюцца ў жахлівых умовах, падвяргаюцца гвалту, пазбаўленыя медыцынскай дапамогі і кантактаў са знешнім светам.
Апошні раз Вялікабрытанія ўводзіла санкцыі ў дачыненні да Беларусі ў траўні 2024 года. Тады абмежаванні закранулі імпарт алюмінію і спадарожныя пастаўкі дапаможных паслуг, а таксама гандаль некаторымі таварамі і тэхналогіямі крытычнай прамысловасці, якія датычацца электронікі, навігацыі і авіёнікі, аэракасмічнай тэхнікі і сілавых установак.
22 лютага стала вядома, што дзяржаўнае прадпрыемства “Завод дакладнай электрамеханікі” і адкрытае акцыянернае таварыства “Планар” уключаны ў пакет санкцый, уведзеных Вялікабрытаніяй напярэдадні другой гадавіны расійскага ўварвання ва Украіну.
8 снежня 2023 года Вялікабрытанія ўключыла ў санкцыйны спіс 17 фізічных асоб, якія займаюць пасады суддзяў і пракурораў, а двума днямі раней Лондан увёў санкцыі супраць канструктарскага бюро “Дысплей” з Віцебска, якое выпускае тэхніку для беларускай арміі, у тым ліку ўдарныя беспілотнікі (“Квадро” — 1400”).
5 жніўня Еўрапейскі саюз увёў персанальныя санкцыі супраць 28 прадстаўнікоў Мінска, якія закранулі сілавікоў, супрацоўнікаў дзяржаўных СМІ, судоў і папраўчых устаноў.