КДБ паведаміў пра затрыманне былога галоўнага ўрача санаторыя Belorus у Друскінінкаі за шпіянаж на карысць Літвы

15 снежня, BPN. Шэсць месяцаў таму КДБ затрымаў Андрэя Кобеля, былога галоўнага ўрача санаторыяў Belorus у Друскінінкаі і “Беларусь” у Сочы за шпіянаж на карысць Літвы, вынікае з сюжэту “Контрразведка. Аперацыі беларускага КДБ супраць спецслужбаў Захаду і Украіны” на тэлеканале “Беларусь 1”.

Сцвярджаецца, што Кобель пад ціскам падпісаў абавязацельства аб супрацоўніцтве з літоўскімі спецслужбамі: “Літоўцы абклалі яго па ўсіх правілах шантажу: пагражалі крымінальнай справай за махінацыю з зямельным участкам, крадзеж сродкаў пры рэканструкцыі санаторыя, маўляў, пазбавяць яго і членаў сям’і віду на жыхарства, а сыну падкінуць у аўтамабіль наркотыкі”.

Кобель нібыта збіраў і перадаваў звесткі аб беларусах, якія адпачывалі ў санаторыях, у тым ліку аб сочырскай рэзідэнцыі Аляксандра Лукашэнкі, што знаходзіцца на тэрыторыі санаторыя.

Галоўны ўрач уладкоўваў на працу “патрэбных людзей”, гаворыцца ў сюжэце. Яго абвінавачваюць у “здрадзе дзяржаве”.

Паведамляецца, што Кобель узначальваў Belorus на працягу 10 гадоў, але не гаворыцца, да якога перыяду адносіцца яго супрацоўніцтва са спецслужбамі Літвы.

Згодна з аналізам выступленняў Кобеля ў СМІ, праведзеным BPN, ён працаваў у Друскінінкаі ў пачатку 2000-х гадоў. У 2006 годзе ён быў галоўным урачом у санаторыі Belorus, а ў траўні 2016-га ўжо працаваў у Сочы.

Абодва санаторыі ў перыяд працы Кобеля належалі Галоўнаму гаспадарчаму ўпраўленню Упраўлення справамі прэзідэнта, супраць якога ў 2020 годзе Еўрасаюз увёў санкцыі.

Былі заблакаваныя рахункі санаторыя Belorus, ён спыніў працу, якую аднавіў пасля таго, як з Упраўлення справамі прэзідэнта сышоў уключаны ў санкцыйны спіс Віктар Шэйман.

У сярэдзіне чэрвеня 2021 года ўрад Беларусі змяніў заснавальніка, перадаўшы аздараўленчую ўстанову ў распараджэнне Рэспубліканскага цэнтра па аздараўленні і санаторна-курортным лячэнні насельніцтва.

У 2017 годзе Кобель працаваў ужо ў Мінску. Ён узначальваў спецыяльна створаны аддзел у РНПЦ медыцынскіх тэхналогій, інфарматызацыі, кіравання і эканомікі аховы здароўя для кіравання праектам “Мадэрнізацыя сістэмы аховы здароўя Рэспублікі Беларусь”.

У рамках праекта пагадненне аб пазыцы паміж Беларуссю і Міжнародным банкам рэканструкцыі і развіцця ад 25 лістапада 2016 года прадугледжвала пазыку ў суме 125 млн долараў ЗША.

У 2020 годзе Кобель быў кіраўніком групы Плана па кіраванні навакольным і сацыяльным асяроддзем (уключаючы інфекцыйны кантроль і кіраванне медадходамі). Гэта складальнік праекта “Экстраннае рэагаванне на COVID-19 у Рэспубліцы Беларусь”, які рэалізоўваўся згодна з пагадненнем аб пазыцы паміж Беларуссю і Міжнародным банкам рэканструкцыі і развіцця ў рамках праекта

Згодна з указам Аляксандра Лукашэнкі, сродкі пазыкі ў суме 90 млн еўра былі выдзеленыя РНПЦ медыцынскіх тэхналогій, інфарматызацыі, кіравання і эканомікі аховы здароўя, які і рэалізоўваў праект.