Сталі вядомыя прозвішчы яшчэ 11 палітвязняў, вызваленых па памілаванні

18 верасня, Позірк. Прозвішчы яшчэ 11 палітвязняў, якія выйшлі на волю па памілаванні, сталі вядомыя 17 верасня.

Праваабарончы цэнтр “Вясна” паведамляе аб вызваленні 16 верасня 10 чалавек: Аляксандра Рукойця, Аляксандра Пугача, Дзмітрыя Кушалевіча, Алега Завадскага, Аляксандра Жука, Мікалая Амельчанкі, Дзмітрыя Сінюты, Сяргея Мазаля, Віталя Санько, Андрэя Рамановіча.

Рукойць пасля затрымання 8 лістапада 2022 года быў асуджаны на тры гады зняволення паводле арт. 130 (распальванне расавай, нацыянальнай, рэлігійнай альбо іншай сацыяльнай варожасці або варажнечы) і арт. 361¹ (стварэнне экстрэмісцкага фарміравання альбо ўдзел у ім) Крымінальнага кодэкса.

Пугача затрымалі 17 жніўня 2022-га. Прыгавораны да 3,5 года пазбаўлення волі паводле арт. 369 (абраза прадстаўніка ўлады), арт. 368 (абраза прэзідэнта), арт. 366 (гвалт альбо пагроза ў дачыненні да службовай асобы, якая выконвае службовыя абавязкі, ці іншай асобы, якая выконвае грамадскі абавязак), арт. 130 КК.

Кушалевіч у снежні 2022 года асуджаны на невядомы тэрмін зняволення паводле арт. 368, арт. 366, арт. 367 (паклёп у дачыненні да прэзідэнта) КК.

Завадскі быў затрыманы 12 студзеня 2023-га, прыгавораны да 3,5 года пазбаўлення волі паводле арт. 368 і арт. 130 КК.

Жук быў асуджаны двойчы паводле арт. 342 КК (арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх). У 2021 годзе яму прызначылі 1,5 года абмежавання волі з накіраваннем у папраўчую ўстанову адкрытага тыпу. 23 ліпеня 2022 года выйшаў на волю, але 6 снежня 2023-га зноў быў затрыманы і асуджаны на 2,5 года зняволення па новай крымінальнай справе за ўдзел у паслявыбарчых акцыях пратэсту.

Амельчанка знаходзіўся ў няволі з 6 сакавіка 2022 года. Прыгавораны (тэрмін невядомы) паводле арт.130, арт. 367, арт. 203¹ (незаконныя дзеянні ў дачыненні да інфармацыі аб прыватным жыцці і персанальных дадзеных), арт. 361⁴ (садзейнічанне экстрэмісцкай дзейнасці) КК.

Сінюта, затрыманы 11 верасня 2023-га, быў асуджаны на невядомы тэрмін паводле арт. 368, арт. 130, арт. 361⁴ КК.

Мазоль паводле арт. 361⁴ КК быў прыгавораны да 2,5 года зняволення. Затрыманы 9 сакавіка 2023-га.

Санько пасля затрымання 19 кастрычніка 2023-га прыгаварылі паводле арт. 361² (фінансаванне дзейнасці экстрэмісцкага фарміравання) і арт. 361⁴ КК. Тэрмін зняволення невядомы.

Рамановіч знаходзіўся ў няволі з 3 траўня 2023-га. Асуджаны на 2,5 года пазбаўлення волі паводле арт. 361⁴ КК.

У жніўні па памілаванні выйшла на волю 76-гадовая пенсіянерка з Бабруйска (Магілёўская вобласць) Наталля Таран. Пра гэта паведаміла “Медыязона” са спасылкай на заснавальніцу ініцыятывы “Палітвязынка” Яўгену Доўгую.

У жніўні 2022 года жанчыну прыгаварылі да 3,5 года пазбаўлення волі паводле ч. 1 арт. 368, ч. 2 арт. 367 і арт. 369 КК.

16 жніўня Аляксандр Лукашэнка падпісаў указ аб памілаванні 30 асоб, асуджаных за злачынствы “пратэстнай накіраванасці”. У ліку памілаваных 14 жанчын і 16 мужчын, “некаторыя з іх маюць сур’ёзныя захворванні”, “ёсць асобы пенсійнага ўзросту”, гаварылася ў паведамленні прэс-службы Лукашэнкі.

4 верасня 7 жанчын і 23 мужчыны, “асуджаныя за злачынствы пратэстнай накіраванасці”, былі памілаваныя ў адпаведнасці з указам № 343, паведаміла напярэдадні прэс-служба Лукашэнкі. Большасць з іх — бацькі непаўналетніх і малалетніх дзяцей.

16 верасня ўказам Лукашэнкі было памілавана яшчэ 37 чалавек. Прозвішчы пяці вызваленых у той жа дзень паведаміў у сваім тэлеграм-канале былы апазіцыйны блогер, а цяпер прапагандыст Раман Пратасевіч. Паводле яго слоў, гэта Аляксандр Фікаў, Таццяна Біруля, Анжэла Сікорская, Міхаіл Корзун і Кацярына Джыг.

17 верасня Пратасевіч назваў яшчэ 10 прозвішчаў. На волю выйшлі Аляксандр Емяльянаў, Ігар Барысаў, Аляксандр Пастэрняк, Уладзіслаў Папоў, Аляксандр Жандораў, Сяргей Мацюхевіч, Яўген Нарэйка, Андрэй Астрацоў, Віталь Чарнавусаў і Зоя Баранава.