У Беларусі менш за 8,8 млн жыхароў, вынікае з дакумента КДК

Апублікавана на адкрытай версіі “Позірку” 31 снежня 2024 года ў 18:58

31 снежня, Позірк. У Беларусі цяпер пражывае менш за 8,8 млн чалавек, вынікае са службовага ліста намесніка старшыні Камітэта дзяржкантролю Станіслава Наркевіча Савету міністраў.

Копію дакумента, складзенага ў лістападзе гэтага года, перадало “Позірку“ аб’яднанне былых сілавікоў BelPol.

У лісце гаворка ідзе аб выкананні даручэння Аляксандра Лукашэнкі аб забеспячэнні да 2025 года “ўсіх спажыўцоў якаснай пітной вадой”. Сярод іншага прыводзіцца статыстыка водазабеспячэння “ў цяперашні час”.

“Па наяўнай у камітэце інфармацыі”, гаворыцца ў дакуменце, цяпер “у рэспубліцы паслуга водазабеспячэння прадастаўляецца 8,6 млн чалавек, у тым ліку арганізацыямі жыллёва-камунальнай гаспадаркі — 8,4 млн, іншых сфер — 0,2 млн”.

Пры гэтым, як удакладняецца, “забяспечанасць спажыўцоў водазабеспячэннем пітной якасці па рэспубліцы дасягнула парадку 98%”.

З гэтых даных вынікае, што ўсяго ў Беларусі ў лістападзе пражывала каля 8,78 млн чалавек (з улікам акругленняў).

Рэальная колькасць жыхароў, верагодна, яшчэ меншая, бо раней эксперты неаднаразова заяўлялі, што ў афіцыйнай статыстыцы не ўлічваецца большасць грамадзян, якія пакінулі краіну. Такі ўлік вядзецца толькі ў дачыненні да тых, хто пасля пераезду паведамляе пра гэта ў дзяржорганы. Пры гэтым, паводле розных ацэнак, пасля падзей 2020 года з Беларусі з’ехалі сотні тысяч людзей.

У інтэрв’ю “Позірку” 5 лютага 2024 года дырэктар даследчага цэнтра BEROC Леў Львоўскі ацэньваў колькасць тых, хто з’ехаў, у 200–350 тыс. чалавек. Аб 350 тыс. гаварыў у непублічным выступе перад вайскоўцамі в/ч 3214 у кастрычніку 2023-га намеснік міністра ўнутраных спраў Мікалай Карпянкоў.

Паводле даных Фонду медыцынскай салідарнасці, якія яго прадстаўніца Лідзія Тарасенка паведаміла “Позірку” 28 снежня, ва ўстановах аховы здароўя Беларусі зарэгістравана 7,8 млн. чалавек.

Паводле звестак Белстата, колькасць насельніцтва Беларусі на 1 студзеня 2024 года склала 9 млн 155 тыс. 978 чалавек. Гэта на 376 тыс. (4,1%) больш, чым вынікае з прыведзенага ліста КДК. Ведамствы могуць карыстацца рознымі данымі.

На пачатак 2023 года ў краіне паводле афіцыйных даных пражывала 9 млн 200 тыс. 617 чалавек. За 2023-ы год колькасць жыхароў зменшылася на 44 639 чалавек (-0,49%).

На 1 студзеня 2022-га ў Беларусі пражывала 9 млн 255 тыс. 524 чалавек, 2021 — га-9 млн 349 тыс. 645, 2020-га — 9 млн 410 тыс. 259.

Са статыстыкі вынікае, што з пачатку 2020 года да пачатку 2024-га колькасць жыхароў скарацілася на 254 тыс.281.

У сваіх разліках Белстат улічвае павелічэнне або памяншэнне колькасці насельніцтва асобных тэрыторый у выніку “змены іх адміністрацыйна-тэрытарыяльнага ўладкавання”.

Звесткі аб колькасці насельніцтва прыводзяцца па пастаянным насельніцтву. Да пастаяннага насельніцтва адносяцца асобы, якія пражываюць у Беларусі адзін год і больш.

З 2020 года Белстат не публікуе даныя аб нараджальнасці і смяротнасці. Пра іх можна меркаваць толькі па ўскоснай інфармацыі.