Беларусь парушыла правы прызнанага палітвязнем адваката Брагінца — працоўная група ААН
24 студзеня, Позірк. Беларусь парушыла правы прызнанага палітзняволеным адваката Віталя Брагінца, да такой высновы прыйшла працоўная група ААН па адвольных затрыманнях пасля разгляду скаргі, якую падалі Беларуская асацыяцыя адвакатаў правоў чалавека і юрысты арганізацыі Respect-Protect-Fulfill.
Як паведамляе праваабарончы цэнтр “Вясна”, група прызнала, што пазбаўленне Брагінца свабоды “заснавана на дыскрымінацыі паводле палітычных поглядаў і яго статусе “адваката апазіцыі”, паколькі ён абараняў кліентаў у палітычна матываваных судах”.
Ён быў арыштаваны “за рэалізацыю сваіх правоў на свабоду выказвання меркаванняў і свабоду мірных сходаў”, што таксама “робіць яго затрыманне адвольным”.
Адзначаецца, што беларускія ўлады “груба парушылі” права Брагінца на справядлівае судовае разбіральніцтва.
“Працоўная група пагадзілася з высновамі пра тое, што ў Беларусі адсутнічае незалежная судовая сістэма, і адзначыла, што беларускія суддзі вядуць “абвінаваўчыя” вытворчасці, парушаючы прэзумпцыю невінаватасці, закрываюць судовыя разбіральніцтвы ад публікі; у абвінавачаных часта ўзнікаюць праблемы з доступам да адвакатаў, а тыя адвакаты, якія працуюць па такіх справах, часта знаходзяцца пад падпіскай аб неразгалошванні”, — падкрэслілі праваабаронцы.
Група прыйша да высновы, што “два паслядоўныя адміністрацыйныя арышты” Брагінца “былі часткай крымінальнага пераследу і былі выкарыстаныя для атрымання доступу да падазраванага без надання яму пры гэтым неабходных працэсуальных правоў”. Адзначаецца, што пры затрыманні юрысту “не паведамілі пра выстаўленыя абвінавачванні”, што з’яўляецца парушэннем. Арышт і ўтрыманне пад вартай “былі адвольнымі, паколькі першапачаткова яны былі санкцыянаваныя пракурорам, а не судом, і за ўсе 10 месяцаў зняволення пад вартай не разглядаліся альтэрнатыўныя меры, не звязаныя з пазбаўленнем волі”.
Група заклікала неадкладна вызваліць Брагінца, надаць яму кампенсацыю, знайсці і пакараць вінаватых у яго адвольным затрыманні. “Інфармацыя пра гэтую справу таксама была перададзена шэрагу спецыяльных дакладчыкаў ААН для таго, каб яны маглі адрэагаваць на сітуацыю”, — паведаміла “Вясна”.
Віталь Брагінец у лютым 2023 года быў прыгавораны да 8 гадоў пазбаўлення волі ва ўмовах узмоцненага рэжыму паводле абвінавачання ў “стварэнні экстрэмісцкага фарміравання”, “закліках да санкцый”, “распальванні <…> варожасці ці варажнечы”, “актыўным удзеле ў дзеяннях, што груба парушаюць грамадскі парадак”. Да затрымання юрыст прадстаўляў у судзе інтарэсы заснавальніка і кіраўніка “Вясны”, лаўрэата Нобелеўскай прэміі міру 2022 года Алеся Бяляцкага, свайго палітзняволенага калегі адваката Андрэя Мачалава. Праз арышт Брагінца апошні застаўся без абаронцы.
Профільная асацыяцыя заклікала свет падтрымаць беларускіх адвакатаў у зняволенні
24 студзеня, Позірк. Падтрымаць адвакатаў, якія знаходзяцца ў няволі па віне рэжыму Аляксандра Лукашэнкі, заклікала міжнародную супольнасць, праваабаронцаў і ўсіх неабыякавых прэзідэнт Беларускай асацыяцыі адвакатаў правоў чалавека Марыя Колесава-Гудзіліна (пазбаўленая адвакацкай ліцэнзіі ў траўні 2022 года). “Напішыце пра іх у сваіх сацыяльных …